Shillong, Jymmang 29: Ka Myntri Khynnah jong ka sorkar pdeng ba dei peit ia ka Tnad Youth Affairs bad Sports, ka Raksha Khadse mynta ka sngi ka la pyniaid ia ka jingialang peit bniah bad u Bah Wailadmiki Shylla, Myntri ba dei peit ia ka Tnad Sports bad Youth Affairs jong ka sorkar Meghalaya, bad u Dr. Vijay Kumar D, Commissioner bad Secretary, Sorkar Meghalaya, ban peit ia ki sienjam kiba dang iaid shakhmat ban kyntiew ia ka kam ialehkai bad ia ki samla ha ka jylla bad wad ia ki lad ki lynti ban pynkhlain ia ka jingiatreilang hapdeng ka Sorkar Pdeng bad ka Sorkar Jylla.
Ha kane ka jingïalang la ïashim bynta da ki heh ophisar na ka sorkar Meghalaya, Sports Authority of India, Meghalaya State Olympic Association bad kito kiba don bynta ha ka jingkyntiew ia ka kam ialehkai bad ia ki samla ha ka Jylla.
Ha kane ka jingïalang, la pynlong ïa ki jingïamir jingmut sani halor ka jinglong jingman ka kam ialehkai ha jylla Meghalaya, ki sienjam ban iatreilang bad ki samla, ki projek ba iadei bad ki jingdon jingem bad ki prokram ban kyntiew ia ki nongïalehkai kiba thmu ban pynkhlain ïa ka jingïashim bynta ha ki jaka nongkyndong bad ban ban thaw ïa ki lad ki lynti na ka bynta ka jingtbit ha ka jingïalehkai.
Ka Sorkar Jylla ka la batai ia ki sienjam bapher bapher ba la sdang na ka bynta ban kyrshan ia ki club, ki seng bad ki nongialehkai, kynthup ia ki lad ai jingkyrshan katkum ki grant na ka bynta ki samla bad ki kam kiba iadei bad ka jingialehkai, ki skhim ban kyntiew ia ki samla bad ki prokram scholarship na ka bynta ki nongialehkai. Ki ophisar ki la pyntip ba haduh 900 ngut ki nongialehkai ki dang ioh jingkyrshan mynta na ka State Sports Scholarship Scheme.
La pynlong ruh ïa ki jingïamir jingmut halor ki sienjam ba kongsan jong ka Meghalaya kiba iadei bad ka jingïalehkai phutbol hapoh ka Chief Minister’s Football Mission, kaba la ïoh mynsiem na ki rukom treikam jong ka South America kiba iadei bad ka phutbol.
Ki ophisar ki la ban jur ba kane ka sienjam ka treikam mynta lyngba ki 125 tylli ki centre ha ki jaka nongkyndong, ka kyrshan ïa jan 10,000 ngut ki nongïalehkai bad ka la iarap ha ka jingpynmih ia ki nongïalehkai phutbol na Meghalaya kiba la iashim bynta ha ki lympung ialehkai shabar ka ri.
Ka jingpeit bniah ka kynthup ruh ïa ki jingthmu jong ka Meghalaya ban pynkhlain ïa ki jingdon jingem ba iadei bad ka kam ïalehkai ha ka jylla, kynthup ïa ka jingiaid shaphrang ba ïadei bad ka Mawkhanu Football Stadium, kaba la thmu kum kawei na ki madan ialehkai phutbol kaba heh tam ha ka thaiñ bad la pyrkhat ban pynlong ia ka opening ceremony jong ka National Games ha kane ka jaka.
Ha kane ka jingïalang la peit bniah ruh ïa ki projek ba iadei bad ki jingdon jingem kiba kynthup ïa ka Umsawli Sports Complex bad ka Slalom Course ha Umtham.
Ki heh sorkar ki la ban jur ba ka Slalom Course ha Umtham ka dang paw kum kawei na ki jaka ba biang tam ban ai jinghikai kiba iadei bad ki jingialehkai ha um bad ka slalom.
Ka Raksha Khadse ka la ban jur ïa ka jingdonkam ban pynkhlain ïa ki jinglong jingman ka kam ïalehkai ha ki jaka nongkyndong, ban kyntiew ïa ka jingïashim bynta jong ki samla bad ban pynthikna ïa ka jingïatylli hapdeng ki sienjam jong ka sorkar Pdeng bad ka Sorkar Jylla na ka bynta ka jingktah kaba khraw.
Ha kane ka jingialang la peit bniah ruh ia ki sienjam jong ka Meghalaya na ka bynta ki samla, kynthup ia ka Youth Engagement and Empowerment Scheme for Students (YESS Meghalaya), ha kaba la pyniar ia ka jingai jingkyrshan sha ki club bad ki seng kiba pyntreikam ia ki prokram kiba iadei bad ki samla.
La ïakren ruh halor ka bynta jong ka MY Bharat ha kaba pyniar ïa ka jingïashim bynta jong ki samla bad ka jingïatreilang jong ki nongtrei mon sngewbha, khamtam ha kaba ïadei bad ka jingwanrah ïa ki lad trei mon sngewbha na ka bynta ki jingïalehkai ki ban sa wan, kynthup ïa ka National Games, lyngba ka rynsan MY Bharat.
Ki nongmihkhmat jong ka Meghalaya State Olympic Association, ba kynthup ïa u Bah John F. Kharshiing, Working President, MSOA bad President, Shooting Association of Meghalaya; Bah EMH Passah Senior Vice President ka Meghalaya Athletics Association uba dei ruh u Dkhot jong ka MSOA; u Bah Pynbiang Laloo, President ka Meghalaya Badminton Association bad Joint Secretary ka MSOA; bad u Bah Ksan Kupar Warjri, General Secretary ka All Meghalaya Karate Association bad Treasurer jong ka MSOA ki la ïashim bynta ha kine ki jingïakren.
Ka Raksha Khadse ka la ban jur ruh ïa ka jingdonkam ban pynkhlain ïa ki academy kiba iasoh bad ka Khelo India bad ban pynïahap ïa ki jingdon jingem ba iadei bad ka kam ïalehkai jong ka jylla bad ki rukom kyntiew ïa ki nongïalehkai ban plie ki lad kiba kham khlaiñ na ka bynta ki samla kiba tbit ha ka kam ïalehkai.
La pynlong ruh ia ki jingiakren ha kaba iadei bad ka Meghalaya Games bad ka jingthmu kaba jrong samoi ban kyntiew ia ki nongialehkai.
Ka Raksha Khadse ka la ban biang ïa ka jingkut jingmut jong ka Tnad ban ïatreilang bad ka Meghalaya ban pynkhlain ïa ki jingdon jingem ba iadei bad ka kam ïalehkai, ki rukom ai jingkyrshan ïa ki nongïalehkai bad ki sienjam ban kyntiew ïa ki samla ha kylleng ka jylla bad ka thaiñ shatei lammihngi.
Ka la ong ba ka Meghalaya ka don kyrhai ki sap ialehkai bad ki jinglong jingman kiba khlain na ka bynta ki samla, bad ka la ban jur ba ki jingïatreilang hapdeng ka Sorkar Pdeng, ka Sorkar Jylla, ki jaka kiba don jingiadei bad ki kam ïalehkai bad ki seng kiba trei ha ki kam ha ka imlang sahlang kin don ka bynta kaba kongsan ha kaba kyntiew ïa ki sap bad ban kyntiew ïa ka jingthmu jong ka kolshor ïalehkai kaba kham khlaiñ ha ka ri.
