Shillong, Jymmang 29: U Bah Alan West u la ong ba u pynrem jur ia ka jingjia ba sngew kyndit halor jingthombor kaba la jia ha ka sngi Palei ha ka jaka shimet kaba dang shna myntaia ka kynja resort jong ka Centrepoint Group ha ka shnong Laitkynsiew ha kaba kila don ki briew kiba la leit ban shoh ban dat ia kiba trei ha katei ka jaka.
Kum kine ki jait jingshah pynsheptieng, ka jingshah shoh bad ka jingshah pynbor, kim don jaka satia ha ka imlang sahlang kaba tipbriew bad kaba kiew khrong. Kane ka jingshah thombor kaba la jia ia ki nongtrei, ka la lam sha ka jingmynsaw jong uwei u mistri uba mynta u dang shah sumar ia lade, ha kaba katei ka long kaba pynkulmar jingmut bad kaba ym lah ban pdiang.
Ka jylla Meghalaya ia kaba la tip ne bna kum ka jaka kaba don ia ka jingsngewtynnat, ka jingpdiang sngewbha, ka jingim lang kaba suk, bad ka jingïohi jngai kaba kiew shaphrang. Ka jingpyrshrang jong ki briew ne ki kynhun ban shoh, ban pynthut ia ki kam pynroi kiba shai, ne ban pyntieng ia ki nongkhaii bad ki nongtrei, kam dei tang ka jingshoh ia ka seng shimet, hynrei ka long ruh ka jingshoh ia ka jingdonkam ba kongsan jong ka jylla bad u paidbah..
Ka Centrepoint Group ka dei ka kynhun kaba la noh synniang shibun eh sha ka jingkyntiew ia ka kam jngohkai pyrthei, ka pynlong kam ka plie ia ka lad kamai jakpoh, ka tei pynbha ia ki nongrim shnong or ka roi ka par ha ki liang ka pynkiad-pyndoh bad ka roi ka par ha ka ioh ka kot ha ka jylla Meghalaya.
Ha ka por ba ka jylla ka pyrshang ban pdiang ia ki nongbei pisa ba kiba kitkhlieh bad ban pynlong lad ia ki samla, kine ki jingjia pyntriem ki phah ia ka khubor kaba sniew bad kaba pynmynsaw ia kiba wan ban bei pisa ha ki kam ki jam, ki nongleit jngohkai, ki nongshna nongtei, bad ia ka ri baroh kawei.
Kum u President jong ka MRTF bad kum u briew uba iadei bha bad ka kam jngoh kai pyrthei, nga kwah ban pyn husiar ba lada kum kine ki kam pyntriem bad shyrkhei la shah ban bteng khlem da pyrkhing, kin thaw ia ka nuksa kaba shyrkhei kaba lah ban pynduhjait jur bad pyn budnam ia ka kyrteng jong ka jylla Meghalaya, ka ioh ka kot bad kiwei kiwei ki kam pynroi.
Ym don kano kano ka kynhun, ka seng ne u riew shimet uba lah ban shim ia ka ain ha ka kti jong u. Ka jingiapher, lada don, dei ban pynbeit da ki lad ki lynti kiba shong ain bad ki jong ka synshar paidbah.
Nga kyrpad ia ki pulit ka jylla Meghalaya bad ka sorkar jylla ba kan tohkit mar mar ia katei ka jingjia bad ban pynshitom katkum ka ain ia kiba leh jubor khlem da pyniapher ia ka seng ne ka niam.
Ka ain ka dei ban long ka kaba hakhlieh duh, bad ka shongsuk-shongshngain, ka jingshngain jong ki nongtrei, ki nongwankai, ki nongshna-kam, bad ki jaka treikam hapoh ka jylla dei ban pynthikna ha kano kano ka por.
Nga kyrpad ia baroh ki nongshong shnong ba don ka jingkitkhlieh, ki nongialam ia ka imlang ka sahlang bad ki kynhun bapher bapher ba kin ia don bynta lang ban pynrem ia katei ka kam pyntriem bad ba shyrkhei. Ka roi ka par ha ka jylla Meghalaya kan lah ban tei lyngba ka jingiasuk, ia tai nia, ka jingburom iwei ia iwei bad ka jingiatreilang kaba tei.
U la ong ba ym dei ban shah ba ki katto katne ki briew kiba bakla lynti kin pynjot ia ka nam kaba ngi la dep wad thma da ka jingshitom bad ia ki jingthmu kiba phyrnai na ka bynta ka lawei jong ka jylla.
