Shillong, Risaw 12: Ka seng sain pyrthei ka Meghalaya Pradesh Congress Committee (MPCC) mynt a ka sngi kala pynlong ia ka jingialang ban pynpaw ia ka jingsngewsih halor ka jingkhlad kyndit jong u Archbishop jong ka jylla niam Shillong u Rev Dominic Jala ha ka jingiatyngkhuh kali ha America.
Ha kane ka jingialang na ka liang jong ka party Congress kala pynpaw ba u Bishop Rev Dominic Jala u long shish u briew ba trei na ka bynta ki rangli ki juki bad u ba bat ia ka nongrim kaba khlem ia shah niam. Ha kane ka sngi kila pynlong ruh ia ka jingsngap jar ba shiminit ban duwai na ka bynta ka mynsiem jong u bishop Rev Dominic Jala.
Na ka liang jong ka MPCC ka pynpaw ruh ia ka jingsngewsih halor ka jingkhlad jongu phadar Mathew Vellankal u ba la ia don lang ha kane ka jingiatyngkhuh kali, ha ka juh ka por ka duwai na ka bynta u phadar Joseph Parekkatt u ba la mynsaw ha kane ka jingia tyngkhuh kali. Kane ka long katkum ka kyrwoh kaba la phah da u Bah James S Lyngdoh Working Preisdent.
Na ka liang jong u Dr DD Lapang ha ka khubor sngewlem kaba la u la phah mynta ka sngi, u la ong ba ka jingkhlad kyndit jong u bishop Rev Dominic Jala ka long ka jingduh kaba khraw ia ka balang katholik, ka kynhun seng niam salesian bad kum juh ia ka jylla baroh kawei.
