Shillong, Iaiong, 13: Ban wanrah iaka jingia jan hapdeng ki khun samla khasi kiba shong ba sah ha ki shnong kiba hap ha ka jylli treikam Jong ka KSU Shillong Mihngi Circle .
Ka Khasi Students’ Union Shillong Mihngi Circle ha ka 13.04.2024 ka la ioh ban plie pyrda ia ka Maitshaphrang Knockout Football Tournament 2024 .
ka jingthmu jong kane ka Lympung kynjat bol ka long ban ai mynsiem ia ki khun samla kiba hap hapoh ka jylli Treikam jong ka KSU Shillong Mihngi Circle khnang ba kin lah ban pyni ia la ki sap ki phong kiba u Blei u La pynkup ha ki Rang ialehkai bad ruh ban pyllait ia ki na ki jingdih kiba sniew kum u drugs bad kiwei kiwei.
La wan ban plie pyrda ia Katei ka lympung da u Samla Biangbor Lyngdoh Paliar (Vice president KSU-CEC) ha ka jingdon ryngkat u samla Klinstar Shabong (Asst Organising secretary KSU-CEC) , Samla Sonstar Nongkhlaw (President KSU-SHILLONG MIHNGI CIRCLE) Ki dkhot ka circle bad ki unit kiba pher bapher.
U samla Biangbor Lyngdoh Paliar haba ai jingkren u la kitbok kitrwiang ia baroh ki team kiba iashim bynta bad u la pynkynmaw ba kam dei ka sien kaba nyngkong ba ka Seng kan pynlong ia kum kine ki lympung hynrei na ka por sha ka por ka ju pyrshang ban plie ki lad ki lynti ia ki khun samla ban pyni bad pynjanai iala ka sap ialehkai football bad kiwei kiwei ki sap ialehkai da kaba pynlong ia ki tournament kiba pher kiba pher.
La wan ban pynshngaiñ Lang ha katei ka sngi da ki nongkitkam shnong Jong ka shnong Mawlong, Mawkynring bad kiwei kiwei kiba la ai mynsiem bad jingiaroh ia ka seng naka bynta Katei ka sienjam.
