Shillong, Lber 31: Ha ka 30 Tarik Lber 2024, Ka HYC Sengkmie kala ioh ban pynkha biang sa ia kawei kashnat treikam ha ka Shnong Umwai kaba la tip kum ka “HYC-Umwai Unit” kaba hap haka Elaka Mawlong Sirdarship.
la kane ka jingialang la pynlong ha ing Dorbar Shnong Umwai da ka jingiadon ryngkat lang U Sordar ka Shnong Umwai, Ki Nongkitkam jong ka Hima Mawlong bad na ki Nongkitkam Ka HYC Sengkmie ba kynthup ia U President ba Rangbah duh jong ka seng Bah Roykupar Synrem, Samla Francis.G Mawlong (Vice President HYC-Sengkmie) bad Samla lsaac.W Basaiawmoit (Secretary HYC- Sengkmie).
Ha shuwa ban sdang ia ka jingialang la ioh ia ka jingduwai bad kyntien pdiang sngewbha na U samla Readystar Sohkhlet (General Secretary HYC-Umwai Unit) bad ia ka jingialang la pyniaid da U samla Isaac. W Basaiawmoit (Secretary HYC-Sengkmie).
La ioh ruh ia ka jingkren na U Bah Tyngshain Wanwar (Sordar ka Shnong Umwai) bad na U Bah Hes Ryngkhlem (Executive Member, Hima Mawlong) kiba la ai ia ki kyntien kyntu kynpham bad kitbok-kitrvwiang ia ka Seng.
Ia ka bynta ban pyntiansmai ia ki dkhot Nongkitkam bathymmai kane ka Shnat treikam la shim ia ka bynta da U Bah Roykupar Synrem uba long U Nongialam ba rangbah duh jong ka Seng hi baroh kawei.
Haba ai jingkren hadien ka jingpyntiansmai, U Bah Roykupar Ula pynshai ia ki mat treikam jong ka Seng bad ha ka jingiaid lynti naduh ba la Seng iaka haduh Une Snem kaban sa kynjoh shen sha U Mawmer ka jingdap ba Shiphew Snem ka jong ka.
U Bah Roykupar Synrem haba kren shaphang ka jinglong bakyrpang jong ka jaidbynriew, U la ong bad kyntu ba kum ka jaidbynriew bad kum ka Seng kaba dang ia ksaid ban pynim ia la ki jong ki Riti ki Dustur ha ka shim jait bad ka khein kur khein kha, ha ka rukom batkhyndew bad ha ka jingbat ia U lakam synshar ba ka dei ka kamram bad kajingkitkhlieh ba kane ka pateng kaba mynta, ba ngin nang iai pynim, iai bud bad baniada iaki snap bakyrpang ki jong ka.
Ula kyntu ruh ia ki Shipai ka Umwai Unit ba kin long kiba peitngor na ka jingioh lad ban wan buhai shnong da kiwei pat ki jaidbynriew kiba nabar kiba la jyllei ha kane ka jaidbynriew ka jong ngi kaba buh jingma pat ia ka jaidbynriew hi baroh kawei.
Ula pyni ruh ia ka jingdonkam iaka jingiatreilang jong ka seng bad ki Dorbar Shnong-Dorbar Hima ha kaban peit ia ka bit – ka biang bad ia ki jingsniew jingma jong ka dong ka Thain bad ka jaidbynriew hi baroh kawei. Ula pynkut da kaba kitbok itrwiang ia kane ka shnat treikam kaba thymmai ba kan long ka Sur bad ka jingiada na ka bynta U paidbah.
Ki Nongkitkam bahakhmat jong ka “HYC-Umwai Unit” ki kynthup ia U Samla Khrawkupar Wanwar (President), U Samla Readystar Sohkhlet (General Secretary) bad 25 ngut ki dkhot nongkitkam jong ka, kane ka long katkum ka kyrwoh kaba la phah da u bah Francis G Mawlong Vice President ka HYC.
