Shillong, Lber, 11: Ki pulit ka special task force ha ka sngi nyngkong ki la ioh kurup 18 kilo u Kynja uba shongdor haduh T.70 hajar.
U Bah Vivek Syiem, Superintendent of Police (City) haba kren sha ki lad pathai khubor mynta ka sngi ba-ar u iathuh ba ki pulit kiba la ioh jingtip kaba bniah na ki tnat syntiat halor ka jingpynpoi ia u Kynja sha Iewduh, Paltan Bazar, ki la pynlong ka jingleit pynap shrip ha ka por 10:30 baje mynstep.
“Ngi suba ba ia une u Kynja la wanrah na ki thaiñ Nongspung. Ngim shym la iohkem satia iano iano ruh kiba donkti ha kane ka jingjia namar ki nongdie ki la phet krad na katei ka jaka hadien ba ki la ioh khubor ia ka jingap ktem ki pulit,” u la ong.
“Ngi dang buddien ia kito kiba donkti ban pynpoi ia une u Kynja sha Iewduh,” ong une u heh pulit ka nongbah Shillong.
Ha kawei pat ka jingjia, ki pulit ka Pateure Beat House, kiba la buddien bha halor ka jingshah pyniap jong uwei u rangbah uba la tip kyrteng kum u Bah Amarshon Nongkynrih, 52 snem ka rta ha Lad Shyiap, Golflink, ha ka 17 tarik u bnai Rymphang, uba trei kum u Parttime Accountant ka Rani Motors, ki la iohkem ia arngut ki runar bar jylla kiba donkti ha kane ka jingjia. Na kine ki arngut la ioh kurup ruh ia ka mobile jong une u rangbah.
Ia kine ki arngut la ithuh kyrteng kum u Akhilesh Kumar Rai bad u Bikash Kumar Rai kiba dang 18 snem ka rta. Uwei na kiba iadonkti lang ha katei ka kam runar u la phetrieh sha Bihar, ong u Bah Vivek Syiem.
Ia kitei ki arngut ki bar jylla la iohkem ha ka 7 tarik mynta u bnai, sngi thohdieng ha kaba ki la phla ba ki la leh ia kane ka kam. Ngi la iohbor na ka Kashari ban set along ia kine ki arngut haduh 7 sngi na ka bynta ban pynlong ia ka jingtohkit kaba bniah.(SP News)
