Jowai, Nohprah 28: Ka sien kaba nyngkong eh ba u Deputy Commissioner jong ka West Jaintia Hills District u la pynduh ia ka license die khaw rashon ha ka shnong Barato namar ba u nongai khaw rashon u la die palat ia ka dor kaba la buh da ka sorkar, wat hapdeng ka jingmana kaba la juh pynmih na ka por sha ka por.
Halor ka jingujor kaba ka ophis jong u Deputy Commissioner kala ioh, la phah ban tohkit bad na ka liang jong u Rangbah shnong u la pyneh bad ha ka jaka ban iathuh ia ki jingshisha u la kylli pynban mano bap hah ia kane ka jingujor. Haba la kylli na u nongai khaw rashon, la iathuh ba u la dei tam ia ka dor ba la buh da ka sorkar da ka jingikren sngewnthuh jingmut bad ka sorkar shnong.
Halor kane, na ka liang jong u Deputy Commissioner jong ka West Jiantia Hills u la pynduh noh ia ka License jong u Fair Price Shop Dealer bad u la ong ia ka dorbar shnong ban thungnoh da u wei ha kane jaka jong une u bala pynduh mynta hapoh jong ka shnong Barato.
U Deputy Commissioner u la pynshai paidbah ba ka sorkar kala ai ia u khaw rashon sha ki dukan rashon ha ka dor T.2.43 tyngka bad la shah ia ki ba kin die pat T. 3 tyngka, na ka liang jong u Deputy Commissioner u la ong ba lada kino kino ki briew kiba bat ia kane ka kam sam khaw rashon lada ki sngewlah ban im na kane ka kam ka bha ia ki ba kin ienoh noh bad ka ophis kan dup ai noh sha kiwei.
Hapoh jong ka National Food Security Act 2013, kid or bar shnong ki long ban shim ia ka jingkitkhlieh ha kaba pyntrei kane ka kam khaw rashon , ha ka jaka ba kin pyntrei kam ia katei ka ain ki pynkhien pynban ia ka ain kane ka long kaba yn nym lah ban pdiang. Lada dang lap ba don kiba die tam ia u khaw ka ophis kan pynshitom katkum ka ain la mana u DC ka West Jaintia Hills.
