Shillong, Rymphang 23: Mynta ka sngi ki pulit jong ka jylla Assam kila pyrshang biang ban wanrah shuh shuh ia ki pulit sha Umalli da ka jignthmu ban tei ia ka Police Outpost ha katei ka jaka da ka bor wat hapdeng ka jingpyrshah.
Katkum ki lad khubor kiba la ioh da u SP News Agency, na katei ka jaka la iathuh ba ki pulit jong ka jylla Meghalaya kila pynehtriang khlem da ailad ba ki pulit jong ka jylla Assam kin ioh ban tei ia ka Police Outpost ha katei ka jaka bad ha ka por jan miet kila hap ban leit phai noh.
Wat la ka jingshong suk shong sain ha katei ka jaka kala don, hynrei ki paidbah ki dang don ha ka jingsyier namar ba ia ki pulit Assam ym lah ban shaniah namar wat la kala don ka jingiapynbeit ha kine ki sngi ban nym pynthud hynrei kaei kaba ki leh mynta ka sngi kala pynduh ia ka jingshniah.
U Bah Kimfa S Marbaniang, la iathuh ba mynta ka sngi kila wan biang ki pulit jong ka Assam sha katei ka jaka hynrei kila leit phai noh bad mynta kam don shuh kano kano ka jingiakynad, haba ia dei bad ka jingong ba kila wan ruh ki shipai na ka liang jong u MLA katei ka thain u la ong hooid, hynrei kila leit phai.
Na ka liang jong u Deputy Commissioner jong ka West Khasi Hills District ruh u la pyntip ba kam don ei ei shuh kala kynjah, wat la katta na ka liang jong ki pulit ki dang don ha katei ka jaka ban peit ba kan nym mih kano kano ka jingpynwit.
