Shillong, Jylliew 21: U Bah Teinwell Dkhar Chief Executive Member jong ka KHADC u la iathuh ba u la ioh jingtip ba na ka liang ong u Lat ka jylla u la pynphai noh ia ka KHADC (Clan Bill), 2018 ryngkat ki daw.
Na ka liang jong u CEM u la ong ba ia kane u dang shu ioh jingtip bad um pat ioh halor kiei ki daw kiba u Lat jong ka jylla u la pynphai, na ka liang jong EC kan da la ioh ia ka jingthoh kin sa shong ban ia kren halor ki daw.
Na ka liang jong u CEM u la ong ba na ka liang jong ka EC kan sa shong pyrkhatkumno ban leh ha kaba ia dei bad kane ka Bill namar la long kaba don kam na ka bynta ban ithuh noh da ka ain ia ki kur.
Na ka liang jong u CEM u la iathuh ba kane ka EC kan nym shong thiat ha kaba ia dei bad kane ka Bill, na ka liang jong ka EC ka kwah ba kane ka Bill ka dei ban long ka ain namar kan long ka jingiada ia ka jaidbynriew khasi.
Na ka liang jong ka EC kan ia leh katba lah ban pynbiang ia ki jingduna hapoh ka Clan Bill kaba la pdiang da ka iing dorbar bad kin pyrshang ban wan rah biang ia kane ka Bill hapoh ka iing dorbar ha ka sien shong dorbar kaban long ha u Naitung jong u bnai ban wan.
