Shillong, Kyllalyngkot 10: U Bah C.B Syiem u ba dei u MDC bad CEM barim ka KHADC mynta ka sngi ryngkat ki nongbud bad da ki spah ngut ki nongkyrshan ki jong u ki la leit ban pyniasoh noh ialade bad ka seng Bharatiya Janata Party BJP kaba la pynlong iakatei ka jing pdiang sngewbha haka Madan ialehkai ka Shnong Umbuda Ri Bhoi District.
La pdiang ia u bah C.B Syiem lem bad ki nongbud ki jong u sha ka party BJP da ki nongialam ba hakhmat jong ka BJP kiba kynthup ia u president ka BJP Ri Bhoi District U Bah Skhem B Swett, U State Vice President U Bah Evreris Marsing, u Secretary in-charge ka BJP Ri Bhoi u Bah Babul Suting, lem bad kiwei kiwei de ki nongialam ba hakhmat ka BJP.
Kum ban shu kdew u Bah C.B Syiem u dei u MDC barim ka Nongpoh Constituency na ka party congress bad hadien kata u la mih noh naka party congress ha u snem 2017 bad u la pyniasoh noh ialade shaka party NPP bad u la ia aireng ruh haka elekshon MLA ha u snem 2018 naka party NPP kaba u la shah rem noh ha u bah Mayral Born Syiem.
Ha dien kata u la mih noh noh naka party NPP bad pyniasoh noh pat bad ka Party UDP haka 25 tarik u Nailar 2022, Bad hadien katto katne bnai U la mih noh sa na ka Party UDP haka 23 tarik Nohprah 2022 bad mynta u la pyniasoh noh ialade lem bad ki nongbud ki nongkyrshan ki jong u sha ka party BJP.
Haba kren hakatei ka sngi u bah C.B syiem u la iathuh kaba pynlong ia u ban mih noh naka party UDP bad pyniasoh shaka party BJP kadei namar ba u iohi ba donkam ban ia don lang haka party kaba bat ia ka bor synshar haduh ha khlieh duh jong ka Ri India lane ha Central khang ban lah ban ai ka jingshakri kaba kham bha sha ki paidbah jong ka Constituency bad jong ka jylla hi baroh kawei.
Shuh shuh u la ong ruh haba iadei bad ka jing ia aireng haka elekshon jied nongmihkhmat sha ka iing dorbar thaw ain ka jylla u lah ong ka shong haka haki nongialam ka party lada ki ibit ia u ban ai tiket ia u ban long kum u kyrtong ban ia aireng hakane ka elekshon u long u ba la kloi ban pdiang bad lada ka party kam ibit u kloi ban long tang kum u nongtrei ba shitrhem jong ka party .
