Shillong, Jylliew 16: Ka sngi burom Mariang ha ka 5tarik Jylliew ba la thmu ban rakhe da ka ba thung dieng, la kylla noh namar ki daw ba ym lah kiar na ka liang jong ka Dorbar Kur Mawrie. Ia kane ka jingthung dieng la leh ha ka sngi Saitjian.
Ka lat thungdieng ba la pynlong mynta ka sngi la pynphuh pynphieng da u Syiem Ainam Manik Syiem jong ka Hima Mylliem u ba la kren mardor halor ka jingpyrshang ka ba khia jingmut jong ka Dorbar Kur Mawrie.
U la pynpaw ka jinglyngngoh bad bynniaw ba ka Kur Mawrie ka khlem ioh bynta ha ka dorbar longsan mansan ha ka Dorbar Hima bad u la kular ban sa pynkup bor ia uno uno u rangbah kur Mawrie ha ka ban kit lem ia ka khia ka shon jong ka hima kum uwei na ki longsan mansan.
Ka jingthmu jong ka Dorbar Kur Mawrie ka long ka ba kyrpang katkum ba la maitphang da u Khlieh Rangbah jong ka Kur, u Bah Leonard Arun Mawrie, ha ka ba nalor ba rakhe ia kata ka sngi burom mariang, la rai ruh ban iakhun pyrshah ia ka jingkylla ka mariang ha suinbneng bad ban pynieng da ka khlaw kyntang ha ka jaka ba ker sawdong ia u mawbah jong ka kur Mawrie.
Ha ka ba kren bynrap da u Bah Johnnystar Marwrie, Sainpyniar ka Dorbar Kur Mawrie, u la pynshai paidbah shaphang ka jingdawa ban pynneh la ka riti dustur da ka ba sumar ia u mawbah jong ka kur Mawrie bad ba la thmu ban tei kiei kiei ki ba dei ki snap tynrai jong ka riti dustur Khasi ka ban long ka lad jingtip ia ka pateng ha ka lawei.
Kiwei kiwei ki ba la kren ha kane ka jingialang ki long u Bah Erwin Khnong Syiem Sutnga bad Bah Raphael Warjri, ki ba la mihkhmat ia ka Synjuk Ki Rangbah Kur Ka Bri U Hynniewtrep, kynthup ruh ia u Bah David War Nongjri, Rangbah shnong jong ka Lyngkien Shyiap Mylliem.
Ia ka kyntien ai khublei na ka longkmie Lucy Mawrie, ka dkhot rangbah jong ka Seng Kynthei Dorbar Kur Mawrie. Hadien ka jingialang ka la don ka jingthung dieng da ki kynrem lyndan bad ki parakur Mawrie baroh ki ba la poi ha kata ka lympung.
