Shillong, Lber 20: Ha dien shi sngi ba ba la wan u Vice president jong ka seng u Rahul Gandhi ka MPCC mynta ka sngi ka la pynlong ia ka jingialang ban pynkhreh ia kane ka election da kaba pynthymmai ia ka rukom trei kam ha duh ki shnong ki thaw.
Kum ka jingpynkhreh ia kane ka election ka jingialang kaba ha khleih duh jong ka MPCC la pynlong mynta ka sngi ha kaba ki nongialam jong ka seng naduh u myntri rangbah haduh ki nongtrei jong ka seng ha ki constituency ki la ia don lang.
Na ka liang jong u myntri rangbah ka jylla u Dr Mukul Sangma u la ba ka seng ka don ka jingkyrmen ba kan jop ia kane ka MP election ka baroh ar tylli ki parliamentary constituency ha kane ka jylla.
La ong ba ka jingai tiket ia u Darly Ch Momin na Tura ka long ba ka seng ka kwah ban ailad kiba dang samla, u la ong ba u PA Sangma u la pynshong ia la ka jong ka khun jong u na ka bynta ka jingmyntoi jong u shimet, la kynnoh u myntri rangbah Dr Mukul Sangma.
Na ka liang jong ka seng Congress ka don ka jingkyrmen ban jop 10 tylli ki seat na Assam, 2 na Manipur, 2 na Arunachal Pradesh bad u wei na Meghalaya.
Ka seng Congress ka kwah ban iohi ba ka Ri India ka dei ban lait na ki kam bamsap ha ki snem kiban dang wan u la ong, dei ka seng Congress kaba la wanrah ia ka ain RTI ban ioh jingtip ki paidbah.
Ha kane ka jingialang mynta ka sngi la pynshai paidbah ia ki kam kiba ka sorkar UPA kala leh bad na ka liang jong u MP u bah Pala u la ong ba kane kam dei ka kam jong u shimet hynrei dei ka kam kaba ka party kala leh na ka bynta jong ki paidbah.(SP News)
