Shillong, Nohprah 24: U Inspector General ki shipai Border Security Force jong ka Shillong Frontier u I S Rana u la pynkup burom ia ki san ngut ki shipai BSF kiba dei na ka kynhun ki BSF na kynhun ba dei na Meghalaya kiba la ia don bynta ha ka jingiakhun ia ka thma Bangladesh ha u snem 1971.
Ia kane ka thma la tip kum ka thma jingpynlait luid ia ka East Pakistan na ka West Pakistan, ia kaba la tip mynta kum ka Ri Bangladesh da ka jingiarap jong ka India ia ki Mukti Bahini ban ia khun pyrshah ia ka kynhun shipai ka Pakistan dei ha kane ka thma ba la pynkha ia ka Bangladesh.
Ki san ngut ki shipai BSF kiba la shah pynkuburom mynta ka sngi ha kane ka jingpynkut ia ka jingpyninam ia ki dur jong ka thma Bangla 1971 ban rakhe ia ka jingdap 50 snem jong ka jingioh laitluid ka ri Bangladesh, ki long u B.C Roy, u Michel Mutheay, u Edward Nutheue, u Rana Das bad u Bhim Raj Limba.
Ha ka jingiathuh ha ki lat pathai khubor la ong ba ha kaba nyngkong ki dei na ka kynhun pulit jong ka jylla Assam, hynrei haba la khi kane ka thma Bangla la shim ia ki bad pynrung sha ka kynhun shipai BSF bad la phah ia ki ban ia khun pyrshah ia ka Pakistan ha Bangladesh.
La ong ba kane ka jingiakhun ha kane ka thma kala neh lai bnai bad ha kine ki lai bnai baroh ki don sha East Pakistan ka Bangladesh mynta ban ia khun pyrshah ia ki shipai ka Pakistan da kaba iarap ia ki kynhun ia leh pyrshah kiba dei na Bangladesh ba mynta, ha kane ka jingiakhun kila iohi ia ka jingialeh kaba jur bha bad ha kane ka jingialeh la lah ban pyndem ia ki shipai jong ka Pakistan.
