Shillong, Jylliew 19: U myntri khynnah ka sorkar pdeng u ba dei peit ia ki kam lynti rel ha ka Ri u Ranjen Gohain mynta ka sngi u la pynlait paidbah ia ka skhim sam tyndong lyer sha ki long iing kiba duk ha kane ka jylla Meghalaya, ia kane ka skhim la tip kum ka Pradhan Mantri Ujjwala Yojana (PMUY).
Haka jingkren jong u Ranjen u la ong ba ia kane ka skhim la pynlait paidbah da u myntri rangbah duh jong ka Ri U Narendra Modi ha ka 1st Jymmang 2016 ha Ballia ha ka jylla Utter Pradesh. Ka jingthmu jong kane ka skhimka long ban pynioh ia ka tyndong lyer sha baroh ki long iing kiba duk na kiba duk tam ha kane ka Ri kiba don haduh 5 klur tylli ki long iing.
Ka jingjied ia ki briew ban ioh ia kane ka skhim la pynshong nongrim katkum ka Socio Ecomonic Caste Census (SECC) 2011. Kane ka skhim PMUY ka ai ka jingiarap pisa ban ioh ia ka tyndong lyer kaba T.1600/- tyngka bad kane kan long tang ia ki kynthei kane ka pisa ka long kum ka boina ba kin ioh ia ka tyndong lyer kaba 14.2 Kilo bad ia ka lyer ki hap ban thied.
Ha dien jong katei ia kane ka skhim la pyntrei kam ruh ha ka jylla, Gujarat, Rajasthan, Madhya Pradesh, Uttrakhand, Odisha, Bihar, Haryana, Chattisgarh , Jharkhand, West Bengal, Assam, Nagaland, Manipur, Arunachal Pradesh bad mynta ha ka jylla Meghalaya. Naduh ba la sdang ia kane ka skhim la lah ban pynioh tyndong lyer haduh 2.2 klur ki long iing ba duk ha baroh kawei ka Ri.
Ha kane ka jylla Meghalaya baroh ki long iing kiba duk na kiba duk tam ki don haduh 1.45 lak tylli bad ia ka tyndong lyer yn sam lyngba ki 46 tylli ki nongsam lyer ha kane ka jylla. Ha kane ka sngi la don lang ka kong Roshan Warjri myntri ka koit ka khiah jong ka jylla, u Bah Kennedy Khyriem Parliamentary Secretary u Additional Chief Secretary u PW Ingty, Ka Iona R Sangma Secretary jong ka sorkar jylla, ia ka jingpdiang burom la aid a u Dipankar Ray Executive Director, Indian Oil AOD State Office bad ia ka jingkren ai khublei la aid a u Bah S S Thangkhiew, State Level Coordinator, Oil Industry, Meghalaya.
