Byrnihat, Iaiong 05: Mynta ka sngi la pynlong ia ka jingialang kaba shi sngi halor ka jingjurip kaba shisien shisnem ia ki karkhana, ia kane ka jinghikai la pynlong ha Maithan Alloys Ltd.
Na ka bynta ban ai jinghikai bad iarap ban pynkhreh hi ia ka ASI return lyngba ka web portal jong ka ASI da ki karkhana ba hap hapoh ka ASI 201-22. Ia kane ka jinghikai la pynlong da ka jingiatreilang bad ka National Sample Survey office, Field Operations Division(NSSO(FOD)), Regional Office, Shillong, Ministry of Statistics bad Programme Implementation(MoSPI), Sorkar India bad Byrnihat Industries Association.
Kumba 30 tylli ki karkhana ba don ha ka thain Byrnihat ki la iashim bynta ha kane ka camp. Ka NSSO, FOD kadei kaba don bynta ban pynlong ia ka jingjurip ha ki bynta bapher bapher ha kylleng ka thain. Ka Annual Survey of Industries (ASI) kadei kawei na ki tyllong jong ka Industrial Statistics ha India.
Ka ai jingtip shaphang ki jingkheinjingdiah ban peitbniah ia ki jingkylla ha ka roi ka par bad ka jinglong jong ki kam shna mar kynthup ki kam ba iadei bad ka jingshna tiar, ki kam maramot, gas bad jingpynpoi um bad ka jingbuhpyndaitthah bad kiwei kiwei.
Kane ka jingjurip ka ai jingtip ba kongsan ban kheinia ka Gross domestic Product (GDP) jong ka ri. La pynlong ia ka jingjuripshisien shi snem hapoh ki kyndon jong ka Collection of Statistics (COS) Act, 2008 (kumba la pynkylla ha u 2017) bad ki kyndon hapoh ka ain ba la wanrah ha u 2011.
Haba ai jingkren ha ka camp, u N. Mohondas Singh, Joint Director & Regional Head, NSSO(FOD), RO Shillong u la ban jur ia ka jingdonkam jong ka ASI data ha ka jingkhein ia ka GDP jong ka ri bad u la kyrpad ia baroh ki karkhana na ka bynta ki jingpynkhreh hi bad ban phah ha ka por ia ki jingsiew.
U la ai jingtip ba kito kiba iaidlaitia kane ki lah ban shah pynshitomkatkum ki ain ba la saindur hapoh ka Statistics Act 2008. U la ong shuh shuh ba la pynlong ia ka Camp ban plié lad ia ka jingpynkhreh hi bad ban pynthikna ka jingphah ha ka por ia ki jingsiew jong ki karkhana.
Ha ka jingmih khmat ia ka kynhun, u P. K. Mishra, Director, Maithan Alloys Limited u la ai khublei ia ka NSSO(FOD) kaba la pynlong ia kum kane ka jingialang kaba kongsan bad kyrpad ia baroh ki karkhana ban phah ha ka por ia ki jingsiew.
Kane ka long ban lait na kano kano ka jingshah pynshitom katkum ka ain pyrshah ia kito kiba iaidlait bad ban ai ka jingiatreilang bad ki ophisar kiba wan jngoh ia ki karkhana. Ha kane ka jingialang la ia donlang ruh ki heh ophisar jong ka NSSO (FOD), RO Shillong
