Shillong, Risaw 19: Ka Meghalaya Pradesh Youth Congress (MPYC) ka la pynlong ka Convention lane ka jingiakynduh lang ki samla ka Congress napoh ka Rilum Khasi Jaintia.
Kane ka jingpynlong ia kane ka jingialang ka long shi bynta ban pynkhreh ia ka ilekshon MP (Member of Parliament) sha Lok Sabha kumjuh ia ka ilekshon MDC shaka Khasi Hills Autonomous District Council (KHADC) 2024,
Kane ka jingiakynduh lang hapdeng ki samla ka Congress la pynlong ha State Central Library Shillong, ha kane ka sngi la don lang u General Secretary ka All India Congress Committee (AICC) ba khmih ia ka Meghalaya u Manish Chatrath, u MP ka Shillong u Bah Vincent Pala, u nongialam ka Liangpyrshah u bah Ronnie V Lyngdoh, ki MLA bad ki MDC ka Congress nalor kiwei kiwei ki nongialam ka Meghalaya Youth Congress.
U president ka MPYC u samla Adrian L Chyne haba kren ha ki lad pathai khubor u la iathuh ba kane ka jingialang ka dei naka bynta ban iamir jingmut hapdeng ki samla ka Party kumno ban nang pynkhlain ia ka Congress ha Meghalaya kmjuh ha ka Ri India baroh kawei.
U samla Adrian ula iathuh ruh ba ha kane ka Convention ka la don ruh ka jingpynsngewthuh ia ki samla ka Party halor ka Bharat Joda Yatra ba la lam khmat da u nongialam ka AICC u Rahul Gandhi kum shi bynta ban iatylli hapdeng ki nong shong shnong ka ri India.
U la iathuh ba ka jingpynlong ia ka Convention ka dei ruh ban kyntiew ia ka saiñ hima ka ba ia ieid bad kaba ia tylli mar kylliang hapdeng baroh ki nong shong shnong ka Ri India.
U samla Adrian u la iathuh ba Ia kane Convention la pynlong na ka bynta ban pynkhreh ia ki samla na ka bynta ka ilekshon MP bad MDC 2024 namar ka la dei ka por ba ki samla kin mih shakhmat ban shim bynta ha ka sain hima na ka bynta ban wanrah ka bha ka miat ia ki samla jong ka jylla bad ka Ri baroh kawei.
