Mairang, Risaw 27: Kum shibynta jong ka jingrakhe ia ka Azadi Ka Amrit Mahotsav, ka ophis jong ka District Sports Officer, West Khasi Hills District, Nongstoin ha ryngkat ka jingiatreilang bad ka District Sports Promotion Society, West Khasi Hills District, Nongstoin hynne ka step ka la pynlong ia ka jingmareh marathon kaba la tip kum ka Fit India Freedom Run 3.0 ia kaba la sdang na ka ophis jong u Deputy Commissioner ka Eastern West Khasi Hills District, Mairang.
Ha kane ka jingmareh marathon kaba 8 Km ia kaba la plié da u Additional Deputy Commissioner ka Eastern West Khasi Hills Distict, Mairang, u Bah A. Nongbri la sakhi ia ka jingwan iashimbynta jong 65 ngut ki nongmareh marathon kynthei bad shynrang ka thain.
Na ka liang ki shynrang, ia ka namjop ba nyngkong, la ioh rah da u Shainingstar Marwein, ia ka namjop ba ar la ioh rah da u Mebansainborlang Pathaw bad ia ka namjop ba lai la ioh rah da u Rahjopkordor Lyngdoh, katba, na ka liang ki kynthei, ka Balasiewdor Pathaw ka la jop ia ka kyrdan ba nyngkong, ka Mebarisha Lyngdoh ka la jop ia ka kyrdan ba ar bad ka Ibashongkun Kurbah ka la ioh rah ia ka kyrdan ba lai.
Ki nongjop ba nyngkong, ba ar bad ba lai jong kane ka jingiakob mareh marathon ki la ioh rah ia ka song pisa kaba san hajar, lai hajar bad ar hajar tyngka.
