New Delhi, Jymmang 15: Ka Tnat Consumer Affairs ka la pynlong ia ka jingiakren mynta ka sngi halor ka jingiada ia ki nongthied na ki online review ba ialam bakla. Ka NidhiKhare, Secretary ka tnat Consumer Affairs ka la pyniaid ia kane ka jingialang.
Ki jingujorna ki nongthied kiba iadei bad ka e-commerce kiba la ioh pdiang ha ka NCH ki la kiew bha. Na ki 95,270 tylli ha u snem 2018 (22% jong baroh ki jingujor), kine ki la kiew sha ka 4,44,034 ha u snem 2023 (43% jong baroh ki jingujor).
Namar ka e-commerce ka plié ia ka lad ban thied tiar lyngba ki lad digital ha kaba ki nongthiedkim ioh ban peit hi da ki jong ki khmat ia ki mar, ki shaniah ha ki review kiba don ha ki rynsan e-commerce ban ioh jingtip ban sngewthuh ia ki jingshem jong kiwei kiwei kiba la dep thied ia kine ki mar ne pyndonkam ia ki jingshakri.
Ka online review ka ai jingsakhina ka imlang sahlang ia ki briew ba don jingmut ban thied ia ki mar bad ki pynskhem jingmut ia ki ban thied ia ki mar ne pyndonkam ia ki jingai jingshakri.
Ka jingdon jong ki online review ba ialam bakla ki ktah ia ka jingshaniah ia ki rynsan thied mar online bad ki lah ban ialam bakla ia ki briew ba kin shim ia ki rai kiba bakla haba thied mar.
Ha u Naiwieng, 2022, ka tnat ka la sdang ia ka Indian Standard (IS) 19000:2022 ‘Online Consumer Reviews — Principles and Requirements for their Collection, Moderation and Publication. Ki mat treikam jong kane ka standard ka dei ka jingkhuid, ka jingbeit, ka jingiadaia ka kyrteng, ka jingshai, ka jingplie lad bad ka jingiakren.
Ka standard ka buh ia ki jingbahkhlieh ia ki nongthoh review bad ki bor kiba peit ia ki review. Katkum ka standard, ki kynhun ki dei ban ai ka kyrteng jong u nongthoh ia ka review lyngba ki lad ba la pynbiang, bad wanrah ia ki rukom treikam, ia kaba la phah sha baroh ki nongtrei bad ki nongpyniaid kam, kiba bataikumno yn bud ia kine ki mat treikam.
Ki jingdonkam ba la buh hapoh ka draft Quality Control Order (QCO) ki ong ba ka jinglum, jingpeit bad jingpynmih ia ki online review ki dei ban long ha ka rukom kaba pynthikna ba la pynmih ia ki review kiba shisha.
Ki jingtehlakam hapoh kane ka QCO ba la thmu ban wanrah ki kynthup, Ka kynhun kan ym pynmih ia ki online review na ki briew ba la lum da ka jingthmu ban don ka jingpeit shiliang.
Ka kynhun kan ym pynkylla ia ki review ban pynkylla ia ka jingmut. Ka kynhun kan ym khang lad ne pynduhmynsiem ia ki briew ba kin ai ia ki review kaba pynrem ia ki mar.
Ki kynhun ki hap ban pyntreikam ia ka rukom kaba iahap ban lum, peit bad pynmih ia ki online review jong ki briew ha ka jingbat ia ki jingdonkam bad ki mat treikam kumba la batai ha ka Indian Standard IS 19000:2022.
Kiba iashim bynta ha kane ka jingiakren ki la pdiang ia ka jingiaid sha ka Quality Control Order na ka bynta ka IS 19000:2022 bad ki la mynjur ba kane ka kam ban pynbeit ia ki online review ba ialam bakla ka dei ka kam kaba kongsan ban iada ia ki nongthied mar na ki rynsan online bad ba dei ban peit bniah bha ia kane. Ia ka Draft Quality Control Order yn sa pynbiang ia u paidbah ban ioh lad ai jingmut ha ka por kaba la buh.
Ki nongmihkhmat na ki kynsan online ba heh (kum ka Google, Meta, Amazon, Flipkart bad kiwei kiwei), ki kynhun kiba don bynta ha kane ka kam, ki kynhun kiba trei ha ki kam kiba iadei bad ki nongtheid mar ba kynthup ka MGP bad ka nongiakhih ba pawnam na ka bynta ki nongthied mar, PushpaGirimji, kito kiba don ha ki kam ain ki la iadon lang ha kaneka jingialang.
Ka la don ruh ka jingai jingtip na ka Tnat Consumer Affairs, kaba ban jur halor ka jingkiew ka jingthied mar lyngba ki lad online ha kine ki por bad ka jingkiew ki jingujor kiba iadei bad ka kam e-commerce ha ka National Consumer Helpline (NCH).
