Shillong Lber 18: Mynta ka sngi ka party Voice of the People Party (VPP) kala pynlong ia ka jingialang sngewnguh ia ki paidbah kiba la ai ka jingkyrshan ia ka party ha kane ka ilekshon MLA 2023 ba ladep.
Ha kane ka sngi, u nongialam ka VPP u bah Ardent Miller Basaiawmoit u la pynkup burom ruh ia u nongthaw bad u nongrwai ia ka jingrwai ‘Kongdeng kongnah ha u Prah’. Bala rwai na ka bynta ka party.
Haba kren ha ka jingialang ha madan Polo, u bah Ardent u la ai khublei ia baroh ki paidbah kiba ai ka jingkyrshan ia ka party ha kaba ki la lah ban ioh ia ka jingjop haduh saw ngut.
U President ka VPP u bah Ardent u la ong ba wat ki stad kiba khein jingkhein ia ka ilekshon ki la pheil ha ka jingiathuh lypa jong ki ha kaba ki la buh ba ka VPP kan ioh 0-1 hynrei ka la jop saw bad la shah rem salit ha Mylliem.
Ki paidbah ha Mylliem kim poi pyrkhat ba u Prah un khlain lada dei ba ki tip ba khlain u Prah, ki la ai syndon ia ka jingkyshan ba pura. Ki paidbah ki ong ba kila shu kyrshan ia ka seng Congress tang ba ki kwah ban pynrem ia ka NPP.
U bah Ardent u la ong ba shi bnai tam ha ka jingiaid lynti ban pynkhreh ia ka ilekshon, ka VPP ka la jop ha ki saw bynta pyrshah ia ka bor pisa ha kaba ki heh spah kiba ialeh pyrshah ia ka VPP ki la khyllem.
