Shillong, Jylliew 29: Mynta ka sngi ka Deputy Commissioner jong ka East Khasi Hills District kala ong ba ki dkhot jong ka seng Federation All School Teachers of Meghalaya (FASTOM) kala pynlong ia ka jingiakhih shong kyllain mungor ha khmat secretariat ha ka 28/6/2022 khlem da ioh ia ka jingbit na ki bor jong ka District Administration.
Kiba la wan ban ia shim bynta ha kane ka jingiakhih shnong kyllain mungor ki don da ki spah ngut kala ktah ia ka leit ka wan bad ka jingiaid ki kali ha katei ka surok bad ha lynti iaid kjat bad ka jingthaw ia ki dara khlem da ioh ia ka jingbit kala ktah ia ka leit ka wan ki paidbah.
Na ka liang jong ka ophis jong ka Deputy Commissioner jong ka East Khasi Hills District kala ai jingbit tang ba kin pynlong ia ka jingiakhih kaba jai jai da ki dkhot jong ka FASTOM kumba la pan jingbit da ki dkhot ka seng.
Haba ia dei bad kane ka jingiakhih shnong kyllain mungor ka FASTOM kam shym pan jingbit ban pynlong ia kane ka jingiakhih da kaba shong kyllain mungor kaba khlem buh por ha khmat jong ka Secretariat bad kane ka long ba kila pynkhein ia ka kyndon 144 CrPC kaba la pynjari da ka District Magistrate kaba la pynmih ha ka 11th Jymmang 2022.
La bthah ia ki dkhot ka FASTOM ka dei ban shim jingbit thymmai na ki bor jong ka District Administration ba kin pynlong ia kane ka jingiakhih shong kyllain mungor ha kawei pat ka jaka bad ki dei ban kynriahnoh na kane ka jingiashong kyllain mungor ha khmat jong ka Secretariat mardor.
Na ka liang jong ka Deputy Commissioner kala ong ba lada kim ia pra noh mar dor na katei ka jaka ki bor jong ka District Administration kim ban se ban leh ia kaba don kam katkum ki kyndon ain, ia kane ka hukom la pynmih mynta ka miet da ka Deputy Commissioner jong ka East Khasi Hills District.
