Mawkyrwat, Naitung 26: Ka KSU South West Khasi Hills District ka pynrem jur iaka Bharatiya Janata Party Meghalaya Unit ha kaba lyngba jong u president jongka U Bah Shibun Lyngdoh ka la kren laplah khlem pyrkhat iaka jingtih uranium kumba ka la paw ha ki lad pathai khubor.
Ka KSU ka ong ba donkam iaka Mining Policy ka ba biang hynrei ka jingianujor bad pyniasyriem ia u uranium bad kiwei ki marpoh khyndew ka dei ka kam biej ia kaba kum ka Jaitbynriew yn nym làh ia ka ban pdiang daleilei. Ka jingong jong u Bah Shibun ba lada don ka Mining Policy kaba biang ka biang ba yn pdiang ia ka jingtih uranium ka dei ka jingpyrshang ban ialam bakla bad pynsngewthuh bakla iaki briew halor ka jingma jong ka jingtih uranium bad ka jingpyrshang ban riam bad tih liewlep iaki paitbah kiba dei ki trai ri trai muluk.
U tei u nongialam ka KSU u la ong ba kan nym don Mining Policy kaba lah ban iada iaka radiation ka ban mih lada tih ia u uranium. U President ka BJP u la dei ban peit nuksa ia kiwei ki Ri ba watla ki la dei kiba Kham shai bad kham stad katno katno ruh hynrei ka USA kam shym la lah ban iada iaki Navajo, ka Australia iaki Aborigines bad ka Japan iaki nongshong shnong jongka haka Fukushima Accident naka radiation ba mih na u uranium.
Ka jingong jongu ba ka jingtih iaki marpohkhyndew kynthup ia u uranium kan Kyntiew iaka ioh ka kot bad ka revenue jongka jylla ka pyni ba um don ka jingkitkhlieh bad um khein pat kaei ka jingktah jong u uranium iaka mariang, iaka koit ka khiah , iaka jingduh noh ki trai shnong iala ki jaka puta bad iaka jingshah pynkynriah shnong noh jong ki paitbah. Kane ka pyni ba u pyrkhat tang ia ka ioh nong shimet bad tang jong ki katto katne naba ka jingshisha ka long ba yn nym don ka jingiohnong hynrei tang ka jingtim iaki jaitbynriew riew lum kiba dei ki trai ri trai muluk.
Ka seng ka kyntu ia u President jongka BJP Meghalaya Unit ba katba um pat donbor ban pyniaid iaka sngi ia u slap, katba um pat lah ban hukum iaka lyer ba kan beh sha ka phang kaba u kwah bad katba um pat lah ban pynkylla ia u uranium sha uwei pat u marpoh khyndew hashwa ba yn tih ia u u dei ban tip bad sngewthuh ba yn nym don kano kano ka Mining policy kaba Shna da u briew ka ban lah ban iada na ka erbih jong u uranium .
Ka KSu ka buh ruh ia kijingkylli ia u President ka BJP ba la u don jingkitkhlieh ne em na ka bynta ka iap ka im jong ka Jaitbynriew ? Lada u don ka jingkitkhlieh u dei ban rah sha ka Central government ba donkam ban pynbna paitbah ba yn nym lushia shuh ia u uranium ha South West Khasi Hills bad ba yn khylliap noh iaka lynnong tih uranium hapoh ka bri Hynniewtrep. Ka jingkren lap lah jong u ka dei hok ba un pynrem bad kum uwei naki dkhot ka Jaitbynriew u la dei ban pyrkhat lem iaka lawei ki khun ki ksiew lajong.
Ka seng ka kynnoh ba Ka jingpyrshang ban khlong jubor da mano mano ia u uranium yn shim ba ka dei ka jingthmu ban pynjahklep iaka Jaitbynriew bad namar kata, la kyntu iaki dkhot ka Jaitbynriew ba horkit hordang ngim dei ban ailad ia kane. Ngi khot iaka Jaitbynriew ban long kiba la khreh bad kiba la kloi ban iakhun pyrshah la ka long da kano kano ka lynti ruh pyrshah iaka UCIL, ka sorkar bad kiwei kiwei. La ong u Bah Forwardman Nongrem president ka KSU SWKD
