Shillong, Lber 11: Ka jylla Meghalaya ka la pynsah ia ka bai light sha ki 11 tylli ki company haduh T.470 klur tyngka bad kane ka kynthuplang ia kaba la pynsah sha ka NEEPCO haduh T.363 klur, ia kane la iathuh da u myntri rangbah ka jylla u Dr Mukul Sangma hapoh iing dorbar halor ka jingpan jingpynshai u MLA jong ka GNC u Clifford R Marak.
U myntri rangbah u la ong ba kane ka pisa ka dei kaba ka sorkar ka thied ia ka bor ding elektrik na ki 11 tylli ki company kala kot sha ka T.473.85 klur tyngka kane ka long haduh ka 28 tarik jong u Rymphang.
La ong ba kane ka jingsah bai light ka long na ka daw ba ki compny kila phah shuh ia ka bill jong ki katkum ka Central Electricity Regulatory Commission (CERC) katkum ka dor bala buh ha u snem 2009 haduh 2014.
Kumba ka long ka bai light man u bnai ka poi haduh T.34.73 klur bad na katei ka pisa ka sorkar ka la dep ban siew haduh mynta tang T.159.41 klur haduh ka san tarik mynta u bnai. Ha kane ka jingshim bai ia ka bor ding ka jingduh ha lynti ka long haduh 30 MW ha kaba ka sorkar ka hap ban siew.
Ka pisa kaba sah bun tan eh ka dei ka ha ka North Eastern Electric Power Corporation Ltd (NEEPCO) kaba la kot sha ka T.364 klur, but sa ka Power Grid Corporation of India Limited whose T.28.39 klur, ka NTPC ka sah T.24.65 klur bad ka National Hydro Power Corporation ka long T.21.23 klur la ong u myntri rangbah. Laong dang don sa kiwei kiwei ki company kiba rit kiba ka sorkar ka hap ban siew nalor jong ki tei.
Ka jylla ka hap ban siew sha ka jylla Assam ha ka Assam Electricity Board ka long T. 14.6 klur namar ba ka jylla ka pyndon kam ia ki kor jong ka ban pynpoi sha ka jylla Meghalaya.
Kumba ka long mynta ka Meghalaya Electricity Corporation Limited ka don ka ram kaba tang shipor haduh T.440 klur ia kaba ka MeECL ka dei ban ioh biang na ka Financial Restructuring Plan jong ka sorkar pdeng ha kaba ia ka la dep ban phah sha ka sorkar pdeng ha u Naitung 2013.
Haba ia dei bad ka jingpynlip ia ka bor ding ha kane ka jylla ka long ka jingsngewkhia kaba khraw wat na ka liang jong ka sorkar ruh namar kane ka ktah ia ki paidbah bad khamtam eh ia ki samla pule kiba dang don hapdeng ki exam mynta hynrei ym lah ban leh ei ei namar ka don ka jingduna bor ding hapdeng 20% haduh 30 % ha kane ka jylla, la ong u myntri rangbah.(SP News)
