Shillong, Naitung 22: Ka kong Langdoh Lamat na ka shnong Lymphylut, Umkiang jong ka East Jaintia Hills District kala pynshai ba u kurim jong ka u bah B Dhar 56 snem ka rta ym don jingiadei ei ei shuh bad ka seng lehnoh HNLC.
Ha ka kyrwoh kaba ka kong Langdoh Lamat kala ong ba u bah B. Dhar 56 snem ba shong ba sah ha Lumphyllut, Umkiang East Jaintia Hills uba Iah shah rah haka 16 tarik Naitung 2021 halor ka jingbthei bom IED ha Khliehriat.
Ka kong Langdoh ka kurim u bah Dhar ka pynrem ia ka jingleh jong ki pulit kiba la shu kem jubor ia u kurim jong ka da kaba pharep ia u tang namar ba u dei u dkhot ba rim jong ka seng HNLC.
Ka kong Langdoh kala iathuh ba 14 snem u kurim jong ka u la shah set byndi hapoh phatok ha Bangladesh bad hadien ba u lah lait napoh phatok ha u snem 2017 u lah khuid ka jingiadei bad ka seng bad u lah don ha shnong ha thaw bad u la trei la ktah bylla katba ioh ha shnong nalor ba u lah heh ka rta bad ki khun ki kti ki lah heh lah san bad lah don ruh ki khun ki ksiew.
Lah kumba 20 snem duna eiei um don bynta eiei shuh bad ka seng bad u lah dkhat iaka jingiadei naduh ba u don hapoh phatok ha Bangladesh. Ka kong Langdoh kala kynnoh ba kane ka jingleh donbor ki pulit kadei ka jingiuhroit iaka hok longbriew manbriew ha kaba ym shym ailad shuh ia u briew ban imsuk imsain bad un im bha im miat da ka jingkylla ka bamut.
Ka kong langdoh kala ong ba ki pulit kila wan ha iing da kaba ong ban tohkit malu mala ia u hynrei mynta ki lah pharep bad phah sha jail Jowai. Ka kurim kala kynnoh ba kane ka jingleh ki pulit kadei tang ka jingpharep jubor khlem ka nongrim, la ong ka kong Langdoh Lamat.
