Shillong, Nailur 18: U myntri rangbah ka jylla u Dr Mukul Sangma u la pynshlur iaki nongrep ha kane ka jylla ban thung ia u Sohmrit khlaw, ba un long u wei pat u jait jingthung ban ai kamai ia ki nongrep.
Ia kane ka jingpynshlur ia ki nongrep ban rep ia u sohmrit khlaw la sdang ha East Garo Hills ha ka jingialang paidbah Rongjeng Government Higher Secondary School, East Garo Hills, ia kaba la pynlong da ka ophis jong ka District Horticulture Officer, East Garo Hills Williamnagar.
U Dr Mukul ha kane ka jingkren ka jong u la ong ba ia kine ki jait jingthung ba la pyndon kam kum kimusla ha kaba shet jyntah ha kylleng ka pyrthei, ha ka juh ka por u la ong ba ka sorkar kan hikai kumno ban thung ia ki katkum ka juk kaba mynta, namar kane ka rukom rep kan iarap ruh ban iada ia ka mariang.
U myntri rangbah u pynshlur ia ki nongrep ba kin sdang ia kane ka kam namar kam long bha ha kane ka jylla, khamtam eh ha Garo Hills. Kane ka iarap shibun ia ki nongrep namar ka Ri India ka phah ia kine ki mar rep sha bar jong ka Ri.
Ha kane ka sngi u myntri rangbah u la sam ruh ia ki tynrai sohmarit sha ki nongrep jong ka tei ka thain ha ka jingiadon lang u MLA jong ka Rongjen u Sengnam Marak bad u MLA, Kharkutta, Cherak Momin bad ki ophisar jong ka tnad horticulture jong ka district.
