Shillong, Jylliew 20: Ka Ophis u Syiem ka Hima Khyrim ha ka 16 tarik u Jylliew, 2022 ka la pynskhem ia u Bah Teiborlang Wankhar kum u Sordar ka Shnong Massar, East Khasi Hills lyngba ka ‘sanad’ ba la shon muhor da u Syiem ka Hima Khyrim, u Paiem Balajied Sing Syiem.
Kane ka dei ka ‘sanad’ kaba nyngkong eh ban pynkup bor ia u Sordar jong kane ka shnong hadien 32 snem ba la pynjari da ka jingsynshar Sordar ha kane ka shnong kata ha u snem 1990.
U Sordar ba nyngkong kane ka shnong u dei u (L) Bah Plison Khongsit uba la synshar khlem ka sanad naduh u snem 1990-2004 bad bud pat da u Bah Teiborlang Wankhar naduh utei u snem bad bteng haduh mynta.
Ka jingialeh ban ïoh ‘sanad’ ka la long naduh u snem 2020 hadien ki kyndon aiñ na ka Khasi Hills Autonomous District Council (KHADC) ba ki bor pyniaid shnong ki hap ban ïoh ‘sanad’ na u Syiem ka Hima Khyrim bad khamtam hadien ka jingmynjur ban pan ‘sanad’ da ka dorbar shnong hi baroh kawei.
Ha shwa u snem 1990, la synshar ia kane ka shnong da u Rangbah Shnong naduh ki snem 1914-15 bad kham ha shwa kane la pyniaid ia ka synshar khadar da ki Lyngdoh naduh ba la seng ia kane shnong naduh u snem 1814.
Ka synshar khadar ka dei beit na kane ka shnong sha ka Hima lane kumba ju tip kum ki ‘lang shi khlieh’ kaba mut lada ym lah ban rai ia ki kam ha ka dorbar shnong yn hap rah beit sha Hima khlem da iaid lyngba na kino kino ki Raid ne Shnat Raid.
Na ka liang ka Executive Committee ka Dorbar Shnong Massar ka pynpaw ia ka jingsngew kmen halor ka jingïoh sanad ba pura u Sordar na ka bynta ka synshar khadar kaba iaid beit ryntih bad ka phah ka kyrwoh ai khublei kitbok kitrwiang ia u Pa’iem ka Hima Khyrim, Dr Balajied Sing Syiem ba un nang shait nang khlaiñ ha ka met ka phad bad nang phuh nang khraw ha ka synshar khadar kum u syiem u kmie.
