Shillong, Nailar 24: Ka seng ki nonghikai hapoh jong ka lama JACATAM, kila pynbna ba kin sangeh ia ka jingiakhih kajong ki bad ki nonghikai naduh ka 26 tarik mynta u bnai kin sdang ban leit hikai biang sha ki kular kumba juh long, ia kane la pynbna da u Chairman jong ka seng u Bah ED Nongsiang.
Haba kren ha ki lat pathai khubor kaba la long mynta ka sngi ha Shillong press club ha dien ba kila dep ban ia kynduh ia u Chief Secretary jong ka sorkar jylla la, ong ba wat la kim hun ia ka jingkular jong ka sorkar, hynrei na ka liang jong ka sorkar kala pdiang ia ki katto katne ki jingdawa ki jong ki.
Ha ka jingiaia kren bad u Chief Secretary jong ka sorkar jylla u KS Kropha, la ong ba na ka liang jong ka sorkar kan pynkiew noh ia ka tulop jong ki nonghikai ha ki skul adhoc bad ki deficit baroh da shispah percent, kane kan long naduh ki Lower Primary School, ki Upper Primary School, kumba leh ia ki Secondary bad Higher Secondary.
Ha kane ka jingiakren n aka liang jong ka sorkar kala tyrwa ruh ia ki nonghikai ba ka sorkar kan thaw ruh ia ka skhim “ New Pension Scheme” kum ka jingmyntoi ia ki shuwa ba kin shong thait na ka kam, na ka bynta ki skul adhoc ka sorkar kan sa kyntiew kyrdan ia ki sha ki deficit katkum ka jingleh bha jong ki skul bad ia ka service rule na ka bynta ki nonghikai yn pyndep hapoh jong ka hynriew bnai.
Ka sorkar nangne sha khmat lada don kano kano kajingiakren ha kaba ia dei bad ki kam skul sorkar kan sa shim ruh ia ki dkhot jong ka seng ha kine kakhep. Ka sorkar kan sa pynkiew ruh ia ka bailut ha kaba pang ba shitom , ia kito ki skul kiba dang don ha ka deficit pattern yn pynkiew ia ki sha ka deficit system ha kip or kiban dang wan.
Halor ka jingdawa jong ki nonghikai ban shimti noh da ka sorkar ia ki nonghikai ka sorkar kala kren shai ba ia mynta ka sorkar kan nym lah ban leh ia kane namar b aka ktah ia ka pla pisa jong ka sorkar jylla, namar kane kan kot sha ka T.400 klur ei ie kajinglut ha ka shisnem.
U Bah Nongsiang u la ong ba, ka long kaei kaei kaba sngewlyngoh ba ki myntri sorkar kim lah ban ia kren bad ki bad ki phah ia ki ban ia kren bad ki ophisar hynrei na ka liang jong ka seng ka pdiang ia kane, halor ka jingiakhih jong ki, ka seng kam pat pynkut, hynrei ka shu weng noh shipor ia kane ka jingiakhih. Ka seng kan pynlong ruh ia ka jingialang paidbah jong ka JACATAM, ha Tura bad Shillong ha kine ki khyndait sngib an sa wan ban ia kren ia kane ka kam.
