Shillong, Nailar 05: Mynta ka sngi ka “Ka Sur Ka Bri Hynniewtrep” kila leit ban tur sha Secretariat ban dawa na ka sorkar ba ka dei ban pyntip paidbah ia ka kaiphot kaba ai da u nongbishar bala shong thiat u Justice T. Vaipei sha ka sorkar halor ka jingshah siat iap u general secretary ba rim ka HNLC u bah Chesterfield Thangkhiew ha iing sah jong u ha Mawlai ha dien ba la wan ban pyndem ha khmat ka ain.
Kane ka kynhun ka KSKBH kala pynlong ia ka jingiapyrtha ha surok ban dawa na ka sorkar ba dei ban sei madan ia ka kaiphot bad ki paidbah ki de ban tip bad u bah Chesterfield u dei ban ioh ia la ka jong ka hok namar u la khlad ha kti jong ki pulit.
U Symbut Myntri Rangbah ka jylla u bah Prestone Tynsong u la phah khot shiphew ngut ia katei ka kynhun ban ia kren, na pdeng kitei ki shiphew ngut ki long u bah Donboklang Kharlyngdoh, Marbud Dkhar bad kiwei phra ngut kila leit ban ia kynduh ia bah Prestone ban ia kren halor ka jingdawa jong ki ia ka kaiphot.
U bah Donboklang Kharlyngdoh haba kren ha ki lat pathai khubor ha dien ka jingiakren bad u Symbut myntri rangbah ka jylla, la iathuh ba na ka liang jong ka sorkar kan sa rah hapoh ka iing dorbar ia ka kaiphot ha ka sngi sdang jong ka jingiashong dorbar ka 09/09/2022.
Haba ia dei bad kane na ka liang jong ka kynhun ki kyntu ia ki MLA baroh khamtam ba dei na Khasi bad Jaintia Hills ba kin ia kren bniah halor ka kaiphot khnang ba ia ki nongialeh kam sniew yn lah ban pynshitom katkum ka ain.
