Shillong, Nailar 3: Ka Federation of Khasi Jaintia and Garo People (FKJGP) hynne ka sngi ka la kynduh ia u myntri ka tnat Animal Husbandry u bah A.L Hek ban pynpaw ka jingpyrshah ia ka jingthmu ka sorkar ban ai jaka ha Upper Shillong ban kynriah ia ka Petrol Pump na Anjalee Petrol Pump.
Haba kren sha ki lad pathai khubor u president ka FKJGP Upper Shillong Circle u samla Kitboklang Nongphlang u la ong ba ka seng ka la ioh jingtip ba ka la dep ban leit jurip sop sop hapdeng ki ophisar ka tnat Veterinary bad ki trai jong ka Petrol Pump ka ba don ha Anjalee jaka ka ba don ha Upper Shillong.
U bah Kitbokla u la ong ba ka seng ka la ioh jingtip ba ka sorkar jylla ka don jingthmu ban ai jaka ban tei thymmai iaka Anjalee Petrol Pump sha Upper Shillong kaba dei ruh ka jaka jong ka tnat Animal Husbandry and Veterinary na ka bynta ban pynkylluid ia ka surok.
U bah Kitbok ula ong ba ka seng kam pyrshah ban pynkynriah ia ka Petrol Pump sha kawei ka jaka hynrei ka seng kan ieng pyrshah ban ai jaka ha Upper Shillong namar ba ka seng ka sngew ba dang donkam ia ka tnad Animal Husbandry and Veterinary ban tei ia ki ophis ka seng ban kyntiew ia ka kam ri jingri.
Haba jubab ia ki jingkylli u bah Kitbok u la iathuh na na ka liang u myntri ka tnat Animal Husbandry and Veterinary u bah Hek u la iathuh ba ia kane ka kam la peit hi da ka tnat Urban Affairs ka ba la shu bthah ia ka tnat Animal Husbandry and Veterinary ban peit jaka ha Upper Shillong.
U bah Kitbok u la ong, Naka liang ka seng kan buddien ia kane ban pynthikna ba ki bar jylla kim dei ban ioh jaka khamtam ha Upper Shillong bad haba ia dei bad kane, ka seng ka sa buddien sa bad u myntri rangbah ka jylla ban pynpaw iaka jingpyrshah.
