Shillong, Nov 16 : La bun ki takma kiba laioh ban khur bad la bun ruh ki paralok ba ioh ban ia kynduh ha kien ki hyniew sngi jong ka 2nd North East Olympic Games 2022 kaba la kut noh ha kane ka sngi Balang ha ka jingpynhap pyrda kaba la pynlong ha ka rukom kaba shongkun bha.
Ha kane ka lympung, ka Manipur ka la ioh ia ka nam kum ka lahduh lane ka Overall Champions bad ioh ban pynneh ia ka nam lahduh ba ka ioh ban bat ha ka NEOG 2018. Ka Manipur ka la ioh ban khur haduh 88 tylli ki takma ksiar, 75 tylli ki takma rupa bad 77 tylli ki takma rnong katba ka Assam pat kaba wan ha ka kyrdan kaba ar ka la ioh da ki 79 tylli ki takma ksiar, 61 tylli ki takma rupa bad 63 tylli ki takma rnong.
Ka jingioh ka Manipur ban knieh ia ka kyrdan kaba nyngkong kadei hadien ka jingiakhun kaba itynnad bha kaba long ha kane ka sngi kut pyrshah ia ka Assam. Hynrei haba phai pat sha ka Arunachal Pradesh, katei ka kynhun ka la neh ha ka kyrdan kaba lai da ki 39 tylli ki takma ksiar, 36 tylli ki takma rupa bad 37 tylli ki takma rnong.
Haba phai pat sha ka Meghalaya kaba dei ka trai jaka, ka la pyni shisha sha ka pyrthei ba ka la kiew stet ha katei ka lympung namar na ka kyrdan kaba hynriew kaba ka don ha u snem 2018 mynta pat ka la kiew sha ka kyrdan kaba saw mynta u snem da ki 36 tylli ki takma ksiar kaba long haduh 12 shah na kaba ki ioh ha u snem 2018. Ha kane ka kynti kaba mynta ka Meghalaya ka la ioh ruh ban khur haduh 35 tylli ki takma rupa bad 78 tylli ki takma rnong.
Ia katei ka lympung la wan ban pynhap pyrda da u Chief Patron jong ka Games, uba dei ruh u Myntri Rangbah ka jylla, Conrad K Sangma, nangta u Myntri ka tnad Kam Ialehkai ka jylla, Bah Banteidor Lyngdoh, Myntri ka tnad PHE jong ka sorkar jylla, Bah Renikton Lyngdoh Tongkhar.
La don lang u Chairman ka Meghalaya State Planning Board u Abdus Saleh, Bah Kimfa S Marbaniang MLA, nangta u Chief Secretary ka jylla Bah DP Wahlang, Commissioner & Secretary ka tnad Ialehkai Dr. Vijay Kumar D, Director General ka Meghalaya Police Dr Lajja Ram Bishnoi bad Secretary General ka North East Olympic Association, Bah John F Kharshiing.
Na ka liang u Myntri Rangbah u la aiti ruh ia ka khusnam Overall Champions sha ka Manipur nangta ia ka khusnam ba ar sha ka Assam bad ruh ia ka khusnam kaba lai sha ka Arunachal Pradesh.
Ia ka lama jong ka North East Olympic Games la aiti pat sha u Bah John Kharshaiing uba hadien pat u la aiti sha u Chef de Mission ka Nagaland, u Neilyalie Angami, namar kadei ka jylla kaban sa pynlong ia katei ka lympung ha ka samoi ban wan.
“Nga ai khublei iaphi baroh iwei pa iwei,” ong u Myntri Rangbah haba kren bad ki nongialehkai kiba lum sawdong ia u. “Ka North East Olympic Games ym tang ba ka wanrah ban pynbiang ia ki jaka ialehkai hynrei khamtam eh ia ki nongialehkai ba ki ioh ban mih madan kata kadei kaba kham kongsan eh.
Nga sngewkmen ruh ban iohi ia ka jingtbit bad ka jinglah ba ki samla na ka thain North East ki don. Nga sngew sarong ba ngi la lah ban pynlong ia kane ka Games ha kata ka rukom kaba la iahap kyrdan bad kiwei kiwei ki jylal ha ka Ri. Kane baroh ka urlogn namar baroh ki iatrei lang kum ka kynhun. Kine ki lympung ki pyni ruh ba lada phi trei kum ka kynhun bad aiti lut kumta kam don satia kano kano ka bym lah ban leh,” u la ong.
Shuh shuh u ong ruhba ki kam ialehkai ki hikai ruh shaphang ka jingjop bad ruh shaphang ka jingshah rem kaba long shi bynta jong ka jingim. U ong ruh ba ki jingialehkai ki hikai ruh kumno ban khie pat na ki jingshah rem bad wanphai biang pat da ka bor kaba kham khlain.
Na ka liang u Myntri ka tnad Ialehkai u la ong ba ka Meghalaya mynta ka la don ha lynti ban pynlong ia kiwei pat ki lympung ialehkai kiba kham heh nangne shakhmat. U la ai ka jingiaroh ia ki lai tylli ki jylla kiba wan shakhmat duh bad khamtam ia ka Meghalaya kaba la lah ban ialehkai bha khamtam ia ka Athletics Team kaba la rah ia ka nam lahduh ha katei ka thup.
U Dr. Vijay Kumar pat u la ai ka jingiaroh ia baroh kito kiba donkti ban pynurlong ia katei ka Games kaba seisoh da ka jingtrei shitom ha kine ki khyndiat bnai ba la dep.
“Ka jingiaroh ba ngi ioh na ki nongialehkai bad ruh na ki ophisar na ki jylla bapher bapher ka la ai mynsiem haduh katta katta,” u la ong da kaba iathuh ruh ban pynkhreh bad pynbit pynbiang na ka bynta ki 3000 tam ki nongialehkai kadei ka kam kaba eh bha.
U ong ruh ba ka jinglah jong ki ban pyndep ia ki kam baroh bad pynbiang nadong shadong kadei eh tang na ka jingiatrei lang kum kawei ka kynhun hapoh ka jingialam jong u Myntri Rangbah kum u nongialam ba hakhmat tam.
Na ka liang u General Secretary ka Meghalaya State Olympic Association, Bah Finely Pariat u la ong ba kadei ka burom kaba khraw ba ka Meghalaya ka don ia u Myntri Rangbah uba la lah ban wanrah bad pynurlong ia kum kitei ki lympung heh ha ka jylla.
Ia katei ka lympung la pynhap pyrda ha ryngkat ki jinglehkmen, ka kynhoi ka risa bad khamtam eh ka rwai ka siaw ba la ai da ki nongrwai ba paw kynthup naduh ka Ahlyna, Gracel Ropmay, Banjop, Lamphang Syiemlieh nalor ka jingpynthaba ba harukom kaba la pynkhih met lut ia baroh ki nongialehkai ha shwa ba kin leit phai noh sha la ki jong ki jong ki jylla.
