Shillong, Lber 06: Ka lympung ialehkai ki khynnah rit kiba hapoh ka 12 snem karta kaba la tip ka U-12 Football Tournament 2014 CMYDS kaba la pynlong da ka ophis jong u District Sports Officer, Ri Bhoi District Nongpoh na bynta ka Jirang Block ka la poi sha kaba kut hynnin ka sngi madan ialehkai ka shnong Umrit.
Ha ka jingiakhun phainal na ki shynrang ka long hapdeng ka Royal United SC bad ka Mawskei Them Gov LP School ha kaba ka Royal United ka la jop da 1-0 ia ka Mawskei Them lyngba ka kol ba la thep da u Divenstar Thongni ha ka minit kaba 58.
Ka jingialehkai ka long kaba itynnad bha ha kaba ki khynnah na baroh ar liang kim shym la tyngkai ia ka buit ka bor bad ki la sei ia la ki sap ki phong jong ki ban ioh ia ka jingjop bad ia kane la sakhi lyngba u Divenstar uba la ioh ban thep shikol ban pynjop ia la ka kynhun da 1-0.
Ha ka jingialehkai ki khynnah kynthei, kaba la long hapdeng ka Royal United SC bad ka Mawskei Them LP School ka la kut ha ka jingiakhaid hynrei ha ka tie breaker ka Mawskei Them ka la jop ia ka Royal United da 3-2 kol ban rah ia ka nam lahduh.
Ha ka sngi pynkut la sam ia ki khusnam sha ki kynhun ba jop bad ki kynhun ba wan baar ryngkat ka jingsakhi lang ki riew rangbah lem bad ki nongpyniaid na ka ophis jong u DSO.
Ki don 10 tylli ki kynhun kiba la wan ban iashim bynta kynthup 6 tylli ki kynhun jong ki khynnah shynrang bad saw tylli ki kynhun jong ki khynnah kynthei ka Royal United SC, Mawskei Them Govt LP School, Umkynsier Govt LP School, Sohdomphlang LP School, Umrit Govt LP School bad Patharkhmah LP School katba na ka liang ki kynthei ki long ka Umrit LP, Royal United, Mawskei Them bad Patharkhmah Govt. LP School.(SP News)
