Shillong, Jymmang 19: Ka kynhun ïalehkai kriket jong ka SP Office ka la rah ia ka namlahduh ha ka Inter Office League 2024 ba la pynlong da ka Shillong Cricket Association(SCA) hadien ba ka la lahban pynliem noh ïa ka Power Grid ha ka jingïakhun Final da 21 ron ia ka ba la ioh ban pynlong mynta ka sngi ka 18 tarik u Jymmang 2024 ha madan MCA Cricket Ground, Polo.
Ha kane jingïalehkai ka Power Grid ka la kam ban bol nyngkong hadien ba jop ïa ka toss. Haba shimti ïa ka pali tied nyngkong ka SP Office ka la kynjoh ïa ka 151 ron haduh kaba kut jong ka 20 over bad shah pynhap 7 wicket. Napdeng ki rangtied kiba la kamai bun ron ïa ka kynhun ki long u Kamal Thapa u ba la tied 52 ron naki 31bol, nangta u Kumar Sewa u ba la tied 33 ron naki 23 bol.
Katba na ka liang ki rangkawangbol ka Power Grid, u Babul Doley u la ïoh ban khur 2 wicket naki 4 overs, shah tied 18 ron, katba u Kunwar Drubh u la ïoh ban khur 2 wicket naki 4 over bad shah tied 22 ron.
Haba pyrshang ban beh ïa katei ka thong ba la buh ka Power Grid ka la shah khanglad noh da tang 130 ron naba shah pynhap baroh 10 ngut ki wicket tang ha ka 19.2 over. U Kumar Chettri u la kamai 33 ron naki 38 bol, nangta u Yogendra u la ïarap 22 ron naki 10 bol.
Dei ki rangkawangbol ka SP Office kiba la lah ban tyngshaiñ ha kane ka jingïakhun, ha kaba u Steve Syiemlieh u la shim 3 wicket naki 4 over, bad u Jetu Daimary u la khur haduh 4 wicket naki 3 over ban khur syndon ïa ka khusnam Player of the Match.
Ha kane ka sngi la ïadonryngkatlang u wei na ki Rangbah ba ju don bynta ban noh jingïarap sha ki kam Sports, u Bah Samborlang Diengdoh kum u Kongsan u ba la aiti ïa ka khusnam sha ka SP Office ka lahduh jong ka Inter Office League 2024, lem bad ki dkhot nongkitkam ka Shillong Cricket Association.
