Shillong, Naitung 23: Khasi Hills Autonomous District Council (KHADC) kala kyntait ban ai ka ka No Objection Certificate (NOC) sha ka tnad Transport ban shim jaka na ka bynta 
ban shna ia ka lynti rel ha Byrnihat, Ri Bhoi District.
U Chief Executive Member (CEM) ka KHADC u Bah Titos Chyne u la ong ba hadien ba ka KHADC kala ioh pdiang ia ka shithi na ka tnad Transport kaba la thoh lyngba ka Deputy Commissioner Ri Bhoi District ba la pan biang ia ka NOC na ka council ha ka jingiadei bad ka lynti rel hapoh Byrnihat.
Halor kane ka jingpan NOC, ka EC kala shim ia ka rai ba ia mynta kim pat lah ban ai ia ka NOC namar kumba phi iohi ka don ka jingpyrshah jur jong kiba bun ki paidbah lem bad ki seng bhalang bad kum ka council ngi dang ieng hi ha kajuh ka nongrim ba ia mynta ngim pat kwah ia kane ka lynti rel.
Shuh shuh u Bah Titos u la ong, Katkum ka shithi ba kila ioh pdiang na ka sorkar jylla lyngba ka tnad transport ka pan NOC ia kajuh ka jaka na ka bynta ban shna lynti rel na Byrnihat sha Lailad.
Ha kaba iadei bad ka pule puthi u Bah Titos u la ong, Ka KHADC kala shim ia rai ba kan iai bteng biang na ka bynta ban ai jingiarap sha kito ki skul kiba ym pat ju ioh jingiarap pisa na ka sorkar jylla na ka bynta ban siew tulop nonghikai kaba long T. 36 hajar shi snem.
U CEM ka KHADc u la iathuh ba ki dang bun bha ki skul ha kylleng ki Constituency jong ki MDC kiba ka sorkar jylla kam shem pat la ai jingiarap eiei sha ki ban siew tulop hynrei kiba hap ban sei hi na ki bor ba pyniaid jong ki skul kumta halor kane ngi la rai ban bteng biang ia kane ka jingai jingiarap sha kum kine ki skul.
U Bah Titos u la ong, ki la ia kren ruh halor ki iew kiba ka council ka don kum ka Iew ha Byrni bad ha laitlyngkot ha kaba ngi dang donkam ban kham pynbha shuh shuh ia ki bad ruh ban pynheh iaki bad ka jingthmu ban shna iew ha Mawlai Mawroh ha ka jingialang ka EC mynta ka sngi.
Ha kaba iadei bad kane ka jingthmu ban shna ia ka Iew ha Mawroh kila aiti haka EM ba dei peit ia ka Iew ban dang peitbniah ia kane ka bynta ia kaei ba donkam ban leh khnang ba kan don kano kano ka jingia sngewthuh bakla na ka liang jong ki paidbah bad khamtam na ka liang jong ka Mawlai Town Dorbar ban ong ba kan don kano kano ka jingleh jubor ne ka jingleh pyrshah ia kaei kaba ki paidbah kim mon.
Haba ia dei bad ki khlaw ka KHADC kala thaw ia ka tnad kaba thymmai kaba la tip kum ka ‘Social Forestry Branch’ bad ka jingthmu jong kane ka tnad ba thaw thymmai ka long ban thung dieng bad kumno ban pynroi ia ka kam thung dieng bad kumjuh ruh ban pynslhur ia ki khlaw shnong ki law adong bad na ka liang jong ka Council kin ai jingiarap khang ba kan long kawei na ki bynta ban iada ia ka mariang hamtam eh ha ka jingjulor ki khlaw ki btap, la ong u bah Titosstarwell Chyne CEM ka KHADC.
