Shillong, Jylliew 24: Mynta ka sngi u Chief Executive Member ka Khasi Hills Autonomous District Council u bah Pyniaid Sing Syiem u la wan rah ia ka rai hapoh ka iing dorbar ban pyrshah ia ka jingthmu ka sorkar pdeng ban pyntrei kam ia ka “Uniform Civil Code” kumba la la paw lyngba ka National Law Commission kaba la pan jingmut na ki pdiabah nongshong shnong ka Ri India.
Haba kren hapoh ka iing dorbar haba wanrah ia kane ka rai u bah Pyniaid u la ong ba kane ka jingthmu jong ka sorkar pdeng ban pyntrei kam ia ka Uniform Civil Code ha ka Ri India kan ktah ia ki riewlum.
Kane kan ktah khamtam eh ia ka jidbynriew khasi kiba don iala ka jong ka riti, ka dustur, ka jinghiar pateng khyndew ka shyiap, ka rukom leh rukom kam, ka shongkha shongman bad kan ktah ruh ha ka jinglaitluid ha ka niam ka rukom.
U CEM u la pan ia ka jingmynjur lang jong ka iing dorbar ban dawa na ka sorkar pdeng ban nym pyntrei kam ia ka Uniform Civil Code hapoh u pud u sam jong ka Khasi Hills Autonomous District Council na ka bynta ban ai ka jingiada kaba kyrpang katkum ki kyndong kiba la don ha ka khyrngit kaba hynriew.
Kiwei kiba la kren halor kane ka phang kiba la ai ka jingkyrshan ki long u bah Bindo M Lanong,ha kaba u la ong ba 76 snem ka ri India kala don mynta ym pat don ki sorkar kiba nud ban rai halor kane namae kane ka don hapoh ka artikle 44 ka riti synshar ka Ri India, la ong ba wat ka Supreme Court haduh mynta kam pat ai kano kano ka rai ia ki mukotduma kiba la poi sha ka.
Ha ka jingkren u bah P. Syiem Deputy CEM u la ong ba kane kala dei ka por ban ia sei ia ki dulir ban pynshai sha ka sorkar pdeng ia ka jinglong kyrpang kum ka jaidbynreiw bad kane ka dei ka por ban hap ban pynshai sha ka Law Commission ka Ri India balei pyrshah iaka Uniform Civil Code.
U nongialam ka Liang pyrshah u bah Titosstarwel Chyne ha ka jingkren ka jong u la ong ba u ai ka jingkyrshan kum ka liang iatei halor kane ka mat kaba ka Executive Committee ban wan rah ia kane ka rai ban pyrshah ia ka Uniform Civil Code. Ha dien ka jingkren baroh ka iing dorbar kala pdiang ia katei ka rai ban pyrshah ia ka jingthmu ka sorkar pdeng ban pyntrei kam ia ka Unform Civil Code ha ki bynta jong ka KHADC.
