Shillong, Jylliew 9: U Myntri Rangbah ka jylla u Conrad K Sangma u la iathuh ba ha ka jingialang jong ka kabinet kaba la long mynta ka sngi kala shim ia rai ba ka sorkar kan shim ia ka jingbah khlieh ia ka ram jong ka MeECL kaba la kot sha ka T.1300 klur kaba la shim na ka REC bad PFC ia kaba la tip kum ka Atmanirbhar Loan.
Kane ka ram kaba la shim na ka REC bad ka PFC ha kine shiphew snem ki ban wan bad sut bad trai kan poi T.2000/- klur tyngka rei, hynrei kan dang kham shong tad kane ban ia kaba pynsah namar lada pynsah ki kopeni ki shim ia ka sur haduh 18% katba sha ka REC bad PFC hap ban siew ia ka sut kaba tang 9%.
Haba kren ha ki lat pathai khubor ha dien ka jingialang jong ka cabinet u myntri rangbah ka jylla u la kren shai ba kane ka dei kata ka jingbhah khlieh jong ka sorkar ia ka MeECL, lada jia ba ka MeECL kam siew ia ka ram ha ka por ka biang biang, ka mut ba yn khate na ka pla pisa jong ka sorkar jylla.
Kane ka ram kaba la shim ka long ban siew pyndep ia ki ram kiba ka MeECL kala shah ha kine ki shiphew snem kiba la leit sha ka NEEPCO kumba T.600 klur sha ka NTPC T.500 klur bad sha kiwei T.100 klur tam, u mynta rangbah u la ong ba lada ka MeECL kam shim ia katei ka ram hapoh ki shiphew snem ha khein lang bad sut bad trai kan poi sha ka T.3000 klur, ban weng ia kane ka jingeh hap ban shim ia ka Atmanirbhar Loan.
U Mytnri Rangbah ka jylla u la ong ba ka REC bad ka PFC kila dep ban pynlait 50% ka ram sha ka MeECL bad shuwa ban pynlait ia ka bynta kaba ar kila buh ar tylli ki jingtrwa ba ka sorkar Meghalaya ka hap ban shim ia ka rai, lada ka sorkar jylla kan ai ia ka jingkular ba kan shiew ia ka ram, lane 25% na ki jingdon ka MeECL dei ban ai pyntrei ka REC ne ka PFC.
U Myntri Rangbah la pynshai ba ha kine ki sngi ka sorkar kam pat shim ia kano kano ka rai, kam dei kuba la kren ha ki lat pathai khubor, ka sorkar ka dang wat ia ki lat ki lynti dei ha kane ka jingialang ka kabinet kaba la long mynta ka sngi la shim ia ka rai ba ka sorkar kan ai ia ka jingbah khlieh 100% ia ka ram kaba la shim da ka MeECL lyngba ka Atmanirbhar Loan.
Ha kane ka jingialang jong ka Kabinet la bhtha ruh ia ka MeECL ba kan hap ban pynbha ia ka jingtrei kam jong ki, naduh ka jingsam ia ka bill light, ka rukom wan poi sha ki jaka trei bad kiwei kiwei ki lad ban pynbha ia ka jingtrei kam jong ka MeECL baroh kawei bad ka MeECL kan hap ban bynda ia ki jingdon jingem jong ka sorkar ka sorkar jylla.
U Myntri Rangbah u la kren shai ba da kaba shim ia kane ka jingbah khlieh kaba 100% ia ka ram jong ka MeECL, lada ka MeECL kam siew sha ka REC bad PFC ha ka por kaba biang, ka sorkar ka hap ban siew kumba la bah khlieh bad kane ka pisa kan dei na ka bhah ka dei ki kam pynroi jong ka jylla.
la ong ba lada ka MeECL kam shim ia kane ka ram ka jingpynlip light ha ka jylla kan long hapdeng 15 bad 18 kynta man ka sngi bad kane ka bai light kadei kaba la shah mynta la palat ia ka shiphew snem, ha kane ka sngi la don lang ruh u myntri ba dei peit ia ki kam bor ding, u Jemas K Sangma bad u CMD jong ka MeECL u Arunkumar Kembhavi.
