Shillong, Jylliew 15: Ka TUR ryngkat bad ki nongdie jingdie madan harud lynti na kylleng ki bynta jong ka Nongbah Shillong da kawei ka jingmut ki la mynjur bad thaw ia ka seng jong ki nongdie-jingdie madan kaba tip kum ka Greater Shillong Progressive Hawkers and Street Vendors Association. Kane ka seng ka kynthup ia baroh kiba shong die jingdie ha madan bad rud lynti ha kylleng ka nongbah Shillong bad ka thong jong ka ka long ban iada ia ka hok kamai jakpoh ki nongdie jingdie madan, ban peit ban khmih ia ka bha ka miat ki nongdie jingdie madan bad kumta ter ter.
Ha katei ka jingialang, la ioh ban iatai bniah halor ki ar tylli ki Ain kiba iadei bad ka hok kamai jakpoh jong ki nongdie jingdie madan, kata ka Ain ba la thaw da ka Iing Dorbar Thaw Ain ka Ri India ka THE STREET VENDORS (PROTECTION OF LIVELIHOOD AND REGULATION OF STREET VENDING) ACT, 2014 bad ka ain jong ka Jylla Meghalaya (The Meghalaya Street Vendors (Protection of Livelihood and Regulation of Street Vending Act, 2014).
Haba ia nujor hapdeng kitei ki ar tylli ki Ain la shem shibun ki jingduna kiba don ha ain jong ka Sorkar Meghalaya bad la shem ruh ba ka Ain jong ka Jylla Meghalaya ka long pynban ka jingpynduh lad bad ka jingkhnoit bein bad ka pyrshang pynban ban pynduh pyndam syndon ia ka hok kamai jakpoh ki nongdie jingdie ha madan bad rud lynti kaba long pyrshah ia ka ain riti synshar jong ka ri india (constitution) bad ka jingpynkhein ia ki hok longbriew manbriew.
Kumta ka TUR bad ka Greater Shillong Progressive Hawkers and Street Vendors Association ka kyntait bad kim pdiang satia ia ka Ain jong ka Sorkar Jylla namar ba kane ka Ain kam khein briew ia ki nongdie jingdie ha madan, kam iada ia ka hok kamai jakpoh ki nongdie madan bad ka khanglad ia ki briew ba kin ieng ha la ki jong ki kjat bad ban kamai kajih bad noh synniang sha ka ioh ka kot bad ka imlang sahlang.
Ka Ain jong ka Sorkar Jylla kam don satia ia ki kyndon kiba kongsan kiba la kdew ha ka Ain jong ka Sorkar India, kum ka nuksa, ka Ain jong ka Sorkar India ka kdew shai katno phew ngut ne spah ngut ne hajar ngut lah ban shah ia ki briew ban shong die jingdie ha madan ha ki bynta ba pher ba pher jong ka Sorbah, nangta ka rukom jurip ia ki jaka ne ki jaka paidbah ne jaka iew ba ki briew ki lah ban shong die jingdie ha madan bad ia kane ka Ain ka Sorkar India ka kdew shai ba ki nongdie jingdie ha madan ki dei ban ia don bynta lang ha ka por ba jurip.
Ka jingialang kaba la long mynta ka sngi da kawei ka sur ruh ka kyntait mar dor ia ka Town Vending Committee kaba la thaw da ka Sorkar Jylla kumba ka la mih ha ki kot khubor ha ka 10 June 2016 namar ia kane la leh khlem da kynjoh ktien ne iakren sngewthuh jingmut bad ki nongdie jingdie ha madan kaba long katkum ka Ain.
Ka jingialang mynta ka sngi ka pynpaw ruh ia ka jingsngew khia kaba jur halor ka jingshah beh bad shah khanglad ia ka kamai jakpoh jongki ba die jingdie ha madan kaba dang iaibteng haduh mynta, wat la ka Iingshari ka Meghalaya (Meghalaya High Court) dang shen ka la ai ka Stay Order halor kane ka bynta.
Ka Jingialang ka la rai ruh ban pynlong da ka jingiaid paidbah (Public Rally) bad ban ai ruh ka Dorkhas (Memorandum) ha U Myntri Rangbah ka Jylla, ryngkat bad ki jingdawa ba ka Sorkar Jylla kan shimkhia ia ki jingeh jong kiba die jingdie ha madan bad ruh ban pynkylla mar dor bad pynbha ia ka Ain ka Sorkar Jylla khnang ba kan long ka atiar ka ban iada bad pynim ia ki nongdie jingdie madan bad ruh na ka bynta ka jingbit jingbiang bad jingmyntoi ka longbriew manbriew bad ka imlang sahlang.
Ha kane ka jingialang la don ryngkat ka seng jong ki nongtrei Nazareth Hospital Workers’ Union, kaba long ka seng kaba nyngkong eh jong ki nongbylla ha ki hospital private, kaba la mih na ka jingiaphylliew jingmut bad jingiakhun hapoh ka Work Campaign ba la sdang da ka TUR.
Ha kaba kut, ka TUR kan iai bteng ban lum ban lang ia ki nongtrei-nongbylla bad ia kito kiba kamai ja kpoh na kaba die jingdie ha madan. Ha kajuh ka por ka khot ka wer ia baroh ki nongshong shnong ban iasnoh kti lang bad ai ka jingkyrshan khnang ba ngin pynlong ia kane ka nongbah ka shnong ha kaba baroh ki lah ban im, ban trei ban ktah bad ban shong ban sah. Kane ka nongbah kam dei tang na ka bynta ki katto katne ngut, hynrei ka dei na ka bynta baroh ki nongshong shnong.Kino kiba kwah ban iasnoh kti ki lah ban phone ha kine ki number 9863097754, 9862477325, 9436312576, 9856066216 and 8974573670, kane ka long katkum ka kyrwoh ba la phah da ka TUR.
