Shillong, Jymmang 25: Mynta ka sngi kala don ka jingiakynduh lang ha pdeng ka seng United Democratic Party (UDP) bad jong ka Hills State People Democratic Party (HSPDP) ha MLA Hostel ban ia kren halor ka jingiatreilang na ka bynta ka election MLA sha ka iing dorbar thawaiñ ka jylla ka ban long ha ba sdang jong u snem 2018.
Ha dien ka jingiakynduh jong kine ki ar tylli ki party bad ha dien ka jingiamir jingmut kila poi sha kawei ka rai ba kine ki ar tylli ki party kin ia treilang ha ka MLA election ka long ha u snem 2018. Mynta ka sngi kine ki ar tylli ki seng saiñ pyrthei kila thaw ia ka UDP-HSPDP Coordination Committee, ha kaba u Dr Donkupar Roy un long u Chairman jong ka Committee.
Haba kren ha ki lad pathai khubor, u Chairman jong ka Coordination Committee u Dr Donkupar Roy, u la ong ba kane ka sngi ka long ka sngi sah kynmaw ha kaba ki ar tylli ki party kila ia mynjur ban ia treilang bad u kyntu ia kiwei ki party ruh ba kin wan sha kane ka kynhun ban ia treilang.
Haba la kylli hato kan don ne em ka jingiatreilang bad ka BJP lane ka NPP, na ka liang jong u Dr Roy u la ong ba kane ka rai ban ia treilang kan long tang ha pdeng ki seng riewlum jong kane ka jylla ym bad ki national party. Haba ia dei bad ka NEDA, u la ong ba kane ka kynhun ka long ban ia kren ia ka khia ka shong jong ka dong shatei lam mih ngi baroh kawei.
U President jong ka UDP u Dr Roy u la ong ba ki paidbah ki dei ban shai “ Kane kam dei ka jingiatylli, hynrei ka ki dei ka jingiatreilang hapdeng ki seng riewlum kham tam ha kine ki 35 tylli ki constituency”. La ong ba na ka liang jong ka UDP hi ka kwah ban don ia ka jingiatylli. La ong ba ha kane ka jingiatreilang kin ki mat ban ia mynjur lang.
Haba la kylli la kala don ne em ka ka jingjingiakren ia u nongialam, u Dr Roy u la ong ba ia kane kin sa ia kren ha dien ba la dep ban pynbna ia ka result jong ka election, kumba juh long ki seng riewlum ha kane ka jylla kim juh pynbna lypa ia u nongialam hynrei ki MLA kin jied ia u nongialam.
Na ka liang jong u Bah Ardent Basaiawmoit u la ong ba ka seng HSPDP kala shim ia ka rai ba kan nym pynieng kyrtong ha ki kotto katne tylli ki constituency bad kane ka rai ban ia treilang ka long na ka bynta ka jingbha jong ka jylla bad mynta kan nym don shuh kata ka jingiaphet seng namar kala don ka ain, ban the lakam. Kane ka jingiakren kala don la katto katne shuwa ba kan mih ka jingthoh na u Bah HS Shylla.
Ki dkhot jong ka Coordination Committee, nalor u Dr Don kum u Chairman, kiwei ki dkhot ki logn u Bah Ardent Basaiawmoit Co-Chairman, u Dr K Shen kum u Secretary bad kiwei ki dkhot ki long u Bah Bindo M Lanong bad ia ki jingdon kam kiba ia dei bad kane ka kam ym sa pyndep noh shen la ong Chairman ka Coordination committee.
