Shillong, Nailur 30: Ka jingiakren pynbeit pud hapdeng u mytnri rangbah ka jylla Meghalaya u Conrad K Sangma bad u myntri rangbah ka jylla Assam u Himanta Biswa Sarma kala long ha State Quest House ha Khanapara ha ka jingiadon lang ki myntri bad ki heh sorkar jong ki ar jylla.
haba la kut ka jingialang u baroh ar ngut ki myntri rangbah haba kren ha ki lat pathai khubor, na ka liang jong u myntri rangbah ka jylla Meghalaya u Conrad u la iathuh ba ha kane ka jingiakren la shim ia ka rai ba ha Lapangap baroh ar tylli ki jylla kin weng noh ia ki pulit bad kin buh noh da ki pulit CrPF jong ka sorkar pdeng ban nym don ka jingiashah liang.
Haba ia dei bad ka jingjia ha Mukroh kaba la wan rah ia ka jingiap jong ki briew na ka liang jong ki ar tylli ki sorkar jylla na Meghalaya bad Assam kin weng noh ia ka jingtohkit bad ia kane yn aiti sha ka Central Bureau of Investigation (CBI) khnang ban ioh ia ka jingtoh kit kaba laitluid.
La pyntip ruh ba ha ien ka jinglehniam Durga Puja u myntri rangbah ka jylla Assam bad u myntri rangbah ka jylla Meghalaya kin leit ban jurip lang sha ki bynta jong ka Khanduli kaba hap hapoh jong ka West Jaintia Hills District.
Ha kane ka jingiakren pynbeit pud kila iakren ruh ia ki hynreiw tylli ki jaka kiba dang sah kiba dang hap ban ia kren bad khmih lynti ba kane ka jingiakren kan dang iaid sha khmat ban poi sha ka thong ban lah ban pynbeit noh ia kane ka jingia kajai pud hapdeng kine ki ar tylli ki jylla kaba la sah teng.
La pyntip ruh ba kin sa phah ia ka tnad jurip khyndew jong ka sorkar pdeng bad ba kin pyndep noh ia ki jingjurip ha ki lai tylli ki jaka shuwa ka 31 Nohprah 2023 khnang ban ioh noh ban thung ia ki mawthum, hynrei ia ki lai tylli ki jaka khlem pat ai kyrteng.
Ha kane ka jingkren na ka liang jong ka sorkar Assam ia u mytnri rangbah u Himanta Biswa Sarma la synran da u Chandramohan Patwary, u Atul Bora ki kabinet mnister bad ki ophisar jong ka sorkar Assam kila don lang.
Katba na ka jylla Meghalaya la synranlang da u Symbut myntri rangbah ka jylla u Sniawbhalang Dhar, bah Comingone Ymbon, kiba dei ki myntri kabinet ha ka sorkar, la don lang u bah Lahkmen Rymbui, Nujorki Sungoh baroh ar ngut ki MLA.
Na ka liang jong ka KHADC la don lang u bah Pyniaid Sing Syiem CEM jong ka KHADC bad ki ophisar, na Jiantia Hills la don lang u bah Thombor Shiwat CEM jong jong ka JHADC, u bah Aiborlang Shadap, MDC jong ka Barato-Mukroh.
