Shillong, Kyllalyngkot 27: Ka Commissionerate of Customs (Preventive) NER Shillong, CBIC, ka tnat kam pla tyngka mynta ka sngi ka la rakhe ia ka International Customs Day 2023 ha U SosoTham Auditorium, State Central Library, Shillong.
U Chief Commissioner, CGST, Customs and Central Excise, Guwahati, u YogendraGarg, uba dei u Zonal head ka Indirect Taxes ha ka thain shateilammihngi u la wan iashim bynta kum u kongsan ha kane ka prokram.
Ha ka jingai jingkren jong u, u Garg u la pdiang ia ki bynta jong ki kynhun kiba iatrei lang kum ka BSF bad Assam Rifles, ITBP, SSB bad kum kine ki kynhun na Bhutan bad Bangladesh.
U la ong ba dei ban lap bad ithuh ia ki sap ba kyrpang. Namar ka jingkiew ka ioh ka kot, ka jingtei ia ki kynhun kiba khlain ka long kaba donkam bha bad ruh kito kiba rung thymmai ha ka kam ki dei ban ioh jinghikai ba bha bad ki dei ban trei ha ki kam ba ki tbit.
U kongsan u la sam ruh ia ki Certificate of Appreciation sha ki ophisar bad ki nongtrei jong ka CBIC bad kikynhun kiba iatrei lang kum ka Assam Rifles bad Border Security Force kum ka jingai jingithuh ia ki kam ba ki la leh.
Ka Commissioner Customs (Preventive) Shillong, ka Abhilasha M. Basaiawmoit ka la ong ba ka International Customs Day, ba la sdang da ka World Customs Organization (WCO) ka dei kaba ju rakhe man u snem ha ka 26 tarik u Kyllalyngkot da ki ri ba long dkhot jong ka.
Ka India ka la long dkhot jong ka WCO ha ka 15.02.1971. Namar ba ka ri ka rakhe ia ka Republic Day ha ka 26 tarik u Kyllalyngkot man u snem, ka Indian Customs ka rakhe ia ka International Customs Day ha ka 27 tarik u Kyllalyngkot man u snem.
Mynta u snem, ka phang jong ka International Customs Day 2023ka long “Nurturing the next generation: promoting a culture of knowledge-sharing and professional pride in Customs.”
Ki ophisar jong ka Customs Preventive NER, CGST, BSF, Assam Rifles bad DRI ki la batai shaphang ki jingshem jong ki, ki jingeh ba ki iakynduh bad ki jingjop ha ka jingiada ia u pud u sam bad ka jingpyntreikam ia ka Customs Act kum shi bynta ka jingrakhe lyngba ka ‘Capacity Building and Knowledge Sharing Programme.’
Ha kane ka sngi, la wan iashim bynta lang ruh da u Chief Commissioner Income Tax, Vice Chancellor (North Eastern Hill University), IG Border Security Force (BSF), ki ophisar ka CBIC ba la shongthait, Consul General Bhutan.
Kiwei kiwei ki nongmihkhmat na ki kynhun kiba iatrei lang bad ka Customs kum ka Income Tax, Assam Rifles, BSF, ki Inspector ba thymmai ka CBIC, ki nonghikai bad ki samla pule ka skul bah NEHU, bad ruh ki ophisar na kiewi kiwei ki tnat Sorkar.
