Shillong, Nohprah 16: Mynta ka sngi ka Nabon Women’s Synod College kaba la seng ha u snem 1996 mynta ka sngi kala rakhe ia ka jingdap 25 snem ha pdeng ka jingphung jingphing ha phyllaw jong kane ka kolej ha Mission Compound, Shillong.
U Mytnri ba dei peit ia ka tnad pule puthi jong ka jylla u bah Lahkmen Rymbui haba kren ha kane ka sngi kum u kongsan la ong ba u myntri rangbah ka jylla u tip bha ia ki jingeh jong ki jaka pule kaba don ha kane ka jylla baroh kawei kaba ka sorkar ka kwah ban leh ei ei.
Haba kren halor ka Nabon Women’s Synod College, u mytnri ka tnad pule la ong ba um kwah ban ai kano kano ka jingkular kuba la pynpaw ha ka dorkhas kaba la ai ha u mynta ka sngi, na ka liang jong u myntri u la ong ba ka sorkar kan sa leh ia kaba don kam ha ka por kaba biang.
Ha kane ka jingialang la pyntip ba mynta u snem ka sorkar kala shim ia ka rai ban iarap ia ki 9 tylli ki College, lada ioh ia ka jingbit ha u snem ban wan yn plie noh ia ka Engineering College ha Shillong bad ia ka Architecture College ha Tura, ka sorkar ka shim khia ban peit bqa ki samla pule kin ioh ban pule ha la ka jong ka jylla.
U Myntri ba dei peit ia ka tnad pule la ai ka jingiaroh ia ka Synod kaba la ai ka jingkyrshan ia kane ka College haduh mynta bad la sngewthuh ba kane ka College ka dei kaba la mang kyrpang ia ki kynthei, u myntri u la kyntu ruh ba ymd ei ban don ia kata ka mynsiem sngewpoh haba ia nujor bad kiwei.
Ha ka jingkren u bah Adelbert Nongrum, la ong ba ka jingdon kane ka college kala iarap shibun ia ki khun samla kane ka jylla ban ioh jaka pule, ha kane ka sngi la noh syniang ruh shilak tyngka bad la ai ka jingkular ba kum u MLA u kloi ban don lem ka kti kamon kti kadiang ban iarap ha kiwei ki kam.
Ha ka jingkren jong u Pastor B Snaitiang jong ka KJP Synod Sepngi la ong ba haduh mynta ka College kam pat ioh jingiarap na ka sorkar, ia kane ka college la kyrshan da ka Synod bad ki para ba ngiet, ia kane ka jingpan jingiarap la kdew ha ka dorkhas kaba la sha u myntri mynta ka sngi.
Kiwei kiba la kren ha kane ka jingialang ki long u Pastor D Rymbai, Prof RNK Hooroo, ia ka jingduwai la pyndep da u Pastor P Hynniewta, la kren pdiang burom da ka Principal kong EC Blah, ha kaba kala batai ba haba sdang ka College ha u snem 1996 ki don 106 ngut ki khynnah bad ka kong S.Sohkhlet ka dei ka Principal laba nyngkong.
