Shillong, Jylliew 10: Mynta ka sngi u MLA jong 56-Gambegre u Saleng A Sangma u la aiti ia ka shithi resign ha u bah Andrew Saimon Commissioner bad Secretary ka iing dorbar thawain ka jylla Meghalaya.
Haba kren ha ki lat pathai khubor ha dien ba la dep ban aiti ia ka shithi resign, u la ai ka burom sha blei ia kane ka jingjop ka jong u kum u MP sha Lok Sabha bad ka jingkhublei kaba kyrpang ka long ia ki paidbah ka Garo Hills kiba la ai ka jingshah niah ban long u MP.
La ong ba kum u MP sha ka iing dorbar jong ka Lok Sabha, u la ong bay kren ia ki ar tylli ki mat kiba la dep ban rai da ka iing dorbar thawain ain ka jylla, ban dawa ia ka Inner Line Permit bad ba pynrung ia ka ktien Garo bad Khasi ha ka khyrngit kaba phra ka Riti Synshar ka Ri India.
Kiwei pat ki mat kiba yn sa kren ka long halor ki kam bamsap, ka jingkyrduh kam kyrduh jam, kam jngohkai pyrthei bad kiwei kiwei kiba ia dei bad ka jylla, ka thain shatei lam mih ngi bad kiba ktah ia ka ri baroh kawei.
U la ong ba mynta u la jop ia ka MP elekshon na ka 2-Tura Parliamentary (ST) Konstitwensi katkum ka rule ba hap ban hiar shuki hapoh ka 14 sngi ha dien bala bam smai kum u MP, na ka liang jong u kwah ban hiar shuki shuwa ban bam smai kum u MP jong ka Lak Sabha.
