New Delhi, Iaiong 19: U Secretary ka tnat kam pohiing jong ka Sorkar Pdeng u la bthah ia ki Chief Secretary jong ki Jylla bad ki Administrator jong ki Union Territory ba kidei ban ai hukum ia baroh ki bor pyniaid ha ki jaka jong ki ban shim ia ki sienjam ban pynsangeh shuwa shipor ia ka jingpynbiang ia ki tyndong oxygen sha ki karkhana.
Laitnoh ia ki 9 tylli ki karkhana kumba la kdew ha ka shithi da u Secretary ka tnat ka koit ka khiah jong ka Sorkar Pdeng kaba ha ka 18.04.2021. Kane ka dei namar ka jingkiew ki case COVID-19 ha katto katne ki bynta jong ka ri.
Ka jingdonkam ia ki tyndong oxygen kaba la mih na ka jingkiew ki case khamtam ha Maharashtra, Madhya Pradesh, Gujarat, Delhi, Uttar Pradesh, Chhattisgarh, Karnataka, Kerala, Tamil Nadu, Haryana, Punjab, Rajasthan bad kiwei kiwei.
Kane ka shithi jong u Secretary ka tnat kam pohiing ka wan hadien ka rai ba la shim da ka Sorkar Pdeng mynta ka sngi, halor ki jingai jingmut ka Empowered Group-II, kaba ong ba ia ka jingpynbiang tyndong oxygen sha ki karkhana dei ban sangeh shuwa naduh ka 22.04.2021 haduh ynda la pyntip da kumwei pat khnang ban pynbiang shuwa ia ki tyndong oxygen sha ki jaka ai jingsumar ha kylleng ka ri khnang ban pyllait im ia ki briew.
