Shillong, Rymphang 03: Mynta ka sngi ki kali kamai hapoh jong ka lama Meghalaya Joint Action Committee and Commercial Vehicles (MJACCV) kila sdang ia ka jingiakhih sangeh kamai kaba khlem buh por bad kane kala trei kam ha baroh ki lum khasi, ha kaba ki Bus bad ki Taxi kila sangeh kamai mynta ka sngi.
Kane ka jingsangeh kamai jong ki Taxi bad ki Bus bad kiwei kiwei ki kali kamai kala ktah nyngkong ia ki iew ki hat, ym tang ia ka iewduh ha Shillong, hynrei ia baroh ki iew ha ki nongkyndong kiba dei ban long mynta ka sngi kila shah ktah namar kim don ki Taxi bad ki Bus ban kamai bad ban kit ia ki briew.
Ha Shillong, ka Them Iew Mawlong, thain Anjelee, Khlieh Iewduh bad Stand Bhoi ki jaka ba ieng ki Bus kiba wan na ki nongkyndong bad ki Sumo kila thylli mynta ka sngi namar ym don kali ba wan la iohi ba ki kali jong ki riew shimet kila ioh ban ieng pahuh.
Haba phai sha ki ophis kiba don ha kylleng jong ki lum khasi kila shah ktah namar bun na ki nongtrei ophis kim don kali la la jong ba kin leit sha ki jaka trei, kane ka jingshah ktah kam dei eh tang ha ki nongkyndong bad hynrei wat hapoh kane ka nongbah Shillong ruh kila shah ktah.
Kane ka jingsangeh kamai ki kali kamai mynta ka sngi kala ktah jur bha ia ka nongbah Shillong ha kaba ki paidbah kim ioh kali ban leit ban wan ban ia beh ia ki kam ki jam jong ki namar ki Taxi kila sangeh ka jingkamai ban pyrshah ia ka jingkuman ka sorkar. Ha kane ka nongbah Shillong la iohi ba dei tang ki kali saw kiba iaid kamai.
