Shillong, Naiwieng 26: Ka Shillong Lajong ka la ïoh ban kyntiew ïalade sha ka kyrdan ba lai ha ka miej kheiñ poiñ jong ka I-League 2023- 24 mynta ka samoi lehkai bad kane ka wan hadien ka namjop pyrshah ïa ka TRAU-FC ha ka sngi saitjaiñ jong ka taïew ba ladep.
Ka TRAU-FC kaba ïakhun da tang shiphew ngut jan naduh ba sdang jong ka jingïakhun ka la ïai bteng namrem bad ïaineh ha ka kyrdan ba khadduh, kata kyrdan ba 13 ha ka miej da tang shi point na ki 7 sien ïakhun.Ha ka jingïalehkai, dei ka TRAU kaba la ïoh ban lamkhmat lyngba u Robinson Singh u ba la thep da ka khlieh ha ka minit ba 13.
Hynrei ka la shimpor tang san minit ïa ka Lajong ban ai jubab lyngba ka penalty kaba khlem shym la pynsepei da u kapten ka kynhun, kata u Hardy Cliff Nongbri.
Ka kynhun ka la ïoh ïa kane ka kabu ksiar ban pynïakhaid hadien ba u bak ka TRAU, u Sunil B u la ïada da ka kti jong u ban khanglad ïa ka bol kaba shut da u Figo Syndai kaba la pynlong ïa u referee ba pynïaid ban kdew sha ka penalty bad sei syndon da ka red card ïa u tei u bak.
Wat hadien ba ka TRAU ka la bteng ïa ka jingïalehkai da tang shiphew ngut hadien ba ïoh red card noh u wei, ka la lah pat ban khanglad ïa ka Lajong ban dang ïoh pynkhihjar. Haduh kaba kut jong ka kylla step ka kynhun ba ïakhun hala ïing kam shym la lah ban pynïakhlad ïa ka jingïakhaid.
Hadien ba la jam sha ka wat ïakhun jong ka kylla miet, ka Lajong ka la ïai bteng ban shim kabu ïa ka jingduna rangïalehkai ka TRAU, bad ñion khlem sangeh.
Ka la shimpor shi slem ïa ka Lajong ban ïoh thep ïa ka kol kaba ar, dei tad ynda la jam sha ka 85 minit ba ka kynhun ka la ïoh ban lamkhmat lyngba ka kol kaba la kum thep hi da u Thomas Singh kaba la pynthikna ïa ka Lajong ban khylliap ïa ka jingïalehkai ryngkat bad ki 3 point.
Lyngba kane ka namjop, ka Lajong ka la kiew sha ka kyrdan ba 3 na ki 3 sien jop kiba lynter ryngkat bad ki 3 tylli ki jingïakhun ba ïakhaid na baroh 6 sien ki jingïakhun ba la pyndep.
Na ka liang jong ka kynhun mynta kan pynkhreh ban aireng pyrshah ïa ka Rajasthan United ha ka 3 tarik Nohprah ha ka por 4:30 janmiet bad ka jingïakhun kan long shabar nala ïing, kata ha Deccan Arena, Hyderabad.
