Mawtamur, Naiwieng 23: katba ka jingiakren hapdeng ka sorkar Meghalaya bad Assam ban ia pynbeit pud hapdeng kine ki ar tylli ki jylla, sorkar Assam ha kine ki sngi kala phah ia ki briew jong ka tnad khlaw ban wan pynkhuid ban shna surok ha Nongwah-Mawtamur kaba hap hapoh Ri Bhoi District.
Ha kane ka jingiakren pynbeit khappud ha pdeng kine ki ar tylli ki jaka ba ka sorkar Meghalaya ka kam ba ka don ka jingiakajia pud, ka Nongwah-Mawtamur ka dei kaba hynniew kaba ka sorkar Meghalaya kala dep ban buh dak.
Katkum ka jingbuh jingkhein jong ka sorkar Meghalaya kane ka jaka Nongwah-Mawtamur ka don ia ka jingeh kaba 137.51 Sg kilometer, ha hap hapoh jong ka Jirang MDC konstitwensi, kane ka jingwan pynkhuid ka tnad khlaw Assam ban shna surok kala wan na shiliang kawah Umor.
Ka Joint Action Committee jong ka Hima Sohiong ha dien bala ioh ia ka jingujor na ka shnong Mawtamur ha ka sngi Nyngkong kala leit sha katei ka jaka ban jurip ban lap ia ka jingshisha hato ka dei shisha ne em ba ka Assam kala wan ban pynkhuid ia ka khaw ha shiliang wah Umor ban shna surok.
Ha kane ka jingleit, ryngkat ki riew rangbah ka shnong Mawtamur la shem ba ka dei ka jingshisha ba la wan pynkhuid ia katei ka jaka da ki briew jong ka jylla Assam, u Bah Prominson Nongrum u wei na ki riew rangbah haba kren ha ki lait pathai khubor ha Um Pailai ba la shna jingkieng siej ka Assam la ong ba la iathuh da ki briew ba pynkhuid ba dei na ka tnad khlaw sorkar Assam.
U Sordar shnong u ba la ia don lang ha kane ka jingleit jurip u bah Useful Lakhmie la ong ba katei ka jaka kaba son sha shiliang ka wah Umor ka dang dei hapoh jong ka Hima Mawtamur bad ka dei ka jaka rep sha shiliang jong u tei u lum, la ong ba na ka liang jong ka shnong kala bthah ia ki briew jong ka Assam kin sangeh shuwa ia kane ka jingtrei.
U bah Purningstar Shabong Nongialam ka JAC Hima Sohiong ba la don lang ha kane ka jingleit la ong ba na ka liang jong ka JAC kan leit buh ia ka jingujor mardor sha ka DC jong ka Ri Bhoi ban ka dei ban leh ei ei halor kane ka jingwan kam jaka ka Assam sha Meghalaya.
Haba ia dei bad kane ka jingwan pynkhuid ka jylla Assam ia katei ka jaka ban shna surok, u bah Purningstar Shabong u buh ka jingkylli ioh leh la dep ban die sha ki shipai bad mynta kane ka jaka ki pynkhuid ban ker kynroh noh ia ka ruh mano ban tip, na ka liang jong ka JAC kan nym shah ba kan jai ei ei ia kane ka jaka ban die lane ba ka Assam kan nym wan kam.
La kynthoh jur ruh ia ka KHADC ba kam peit iala u jong u pud u sam bad ka long kaba lyngoh ba kum ka nongda nongker ia ka khyndew ka shyiap pat kam leh ei ei kane ka jaka Mawtamur ka dei hapoh ka jingpeit jong ka District hynrei ka District Council kam patiaw hato don ei ei kaba kam KHADC kam kwah ban leh ei ei.
Ha kane ka jingleit jong ka JAC sha Mawtamur u Secretary ka Hima Sohiong ba dei peit ia ka Nongwah Mawtamur u la poi sha shnong Mawtamur hynrei um shum leit lang sha katei ka jaka ba wan pynkhuid ka jylla Assam bad ka JAC lane bad ki nongkit kam shnong.
