Shillong, Rymphang 18: U Dr Jemino Mawthoh Secretary jong ka Sub Committee jong ka UDP u la pyntip ba ka rai jong ka UDP kaba la mih na ka jingialang kaba la long ha ka sngi thohdieng ha iing jong u president ka seng, ka long ba ha ka sngi nyngkong kin leit ban ai da ka jingujor sha u myntri jong ka District Council Affair jong ka sorkar jylla ia ka jingjubab tang dep rukom jong u Ban PN Syiem halor ki khyndai tylli ki mat kiba ka UDP kala pan na u CEM jong ka KHADC.
Kawei pat ka rai ka long ba na ka liang jong ka UDP kan sa ia thir hapoh ka iing dorbar halor ki khyndai tylli ki mat kiba kala pan jongpynshai na u CEM jong ka KHADC ha kane ka dorbar mang tyngka kaban sdang ha ka 20 tarik mynta u bnai la ka long ha kano kano ka dur halor ki khyndai tylli ki mat kaba kila dep phah da ka jingthoh namar ba kim hun ia ka jubab kaba la phah na u CEM.
U Dr Jemino u la ong ba ha kane ka synshar paidbah kum ka party kaba ia trei lang ha poh ka EC ka don ia ka hok jong ka ban pan jingpynshai hynrei ka rukom ai jingpynshai na ka liang jong u CEM jong ka KHADC kam shai, ka seng ka kwah ba u CEM un jubab kawei pa kawei ka mat kaba kila pan hynrei ka jingjubab jong u CEM la long tang shi kyntin.
Ha ka jingialang kaba ki la long ki mir jingmut sani bha ha kaba ia dei bad kane ka kam bad kala don ka jingai jingmut na ki dkhot ha kiba bun ki rukom bad ha dien ki sa shim kum ka party ia ki tei ki ar tylli ki rai ba kin ai da ka jingujor pyrshah ia u CEM jong ka KHADC sha u minister ba dei peit ia ka DCA bad kum ki MDC jong ka party kin ia kren halor kitei ki khyndai tylli ki mat hapoh ka iing dorbar.
