Shillong, Rymphang 05: Mynta ka sngi ha ka por mynstep kumba 5 baje ei ei ka la don ka jingiapyniap briew ha ka shnong Nongtrai kaba hap hapoh jong ka East Khasi Hills District jong ka Mawsynram Police station.
Mar ia tip ia kane ka jingjia na ka liang jong ki pulit kiba don ha Mawsynram ki la leit bran bran sha katei ka jaka bad ki la lap ba u ba shah pyniap u dei u Bah Manful Lyngdoh 32 snem ka rta.
Ha kane ka jingleit ki pulit ki la lap ia kawei ka wait bnoh kaba la suba ba la pyndon kam da kane ka wait ban bom ia une u briew. Na ka liang jong ki pulit ki la kem mardor ia ar ngut ki briew kiba la tip kyrteng kum u Bah Boss Syiemlieh bad ia u Bah Lanstar Syiemlieh. Ki pulit ha dien ba ki la ioh kem ki la pynlong ia ka jingtohkit ban lap ia ka daw. (SP News)
