Shillong, Jymmang 04: U Myntri Rangbah ka jylla u Conrad K Sangma mynta ka sngi u la iaid da ka kjat kumba shi kynta bam ban leit ban jurip iaka wah Umjarasi kaba dei ka kawei na ki hynniew tylli ki tyllong um jong ka Shillog Municipal Board kaba mih na u lum Shyllong.
Ha dien ba la wan jngoh ia kane ka tyllong um la shem ba ka jingmih jong ka um kala hiar bha na ka daw jong kane ka jingrang rynkhiang ka suin bneng, u myntri rangbah la ong ba ka nongbah Shillong bad kiwei ki bynta jong ka jylla ki don ha pdeng ka jingkyrduh um bad kane ka dei na bun kid aw.
Ka daw kaba kongsan ka dei na ka jingkylla ka suin bneng bad ka jinglong mei mariang ki don ka bynta kaba khraw tam ha kaba hap ban ia kynduh ia kane ka jngeh, u myntri rangbah la ong ba ki don ki bynta kaba ki lah ban leh ban pynduna ia kane ka jingeh kaba ia kynduh.
Kane ka long ba kumno ban pyniaid ia ki tyllong um ha ki rukom kiba kham bha , halor kata ka nongrim kawei na ki sien jam ka long ban pynthikna ba ki tyllong um bapher bapher, kiba don ha kylleng ki jaka nongbah bad ki jaka sor dei ban pyndon kam ia ki bad ban bha ia ki bad ban pynneh da kaba pynlang ia ka um katba don ka lat.
Ban leh ia kane ka long da kaba pyndon kam ki kor ki bor kiba don katkum kane ka juk kaba mynta bad kane ka dei ka nongmuna kaba u myntri rangbah u la leit ban jurip hi da lade ia ka wah Umjarasi kaba don hapoh jong ka khlaw sorkar ba ki dang shu dep ban peit.
La iathuh ba ha kine ki shisnem shiteng kiba la dep ki tnad sorkar bapher bapher ki dang ia peit bniah ba kumno yn lah ban pynneh pynsah ia ka um bad ban pynbha ia ka jaka pynlong um, kane ka dei ka wei na ki tyllong um hynrei ki don hynniew tylli ki tyllong kiba peit ka SMB.
Kaei kaba ki lah ban pynneh pynsah ia ka um ka long sa tang ban shna ia ki jaka pynlang kum kim ki dam ha kano kano ka jaka jong kiwah kaba lah ban pynneh ia ka um, kane ym tang ba ki pynlong ia ka um hynrei ka iarap ban pynneh pynsah ia ka um bad kine kin long ki lat jingiada.
Ha kane ka sngi kiba la synrang lang ia u myntri rangbah ki long ki ophisar na ka SMB, ka PHE, Meghalaya Pollution Board bad ka MBDA kiba la ia don lang ban sngewthuh ba kumno ban pynneh pynsah ia ki tyllong.
