Shillong, Nailur 25: Ka KSU Mawkasiang Unit kum shi bynta ban rakhe ia ka jingdap shi snem thik jong ka, ka la pynlong da ka Maitshaphrang Invitation Football Tournament mynta ka sngi ka 25 tarik u Nailar 2021.
Ha kane ka tournament la ia shim bynta da 4 tylli ki kynhun kiba kynthup ia ka KSU Mawkasiang Unit, KSU Shillong Mihngi Circle, Mawkasiang Sports & Cultural Club bad ka Shillong Labet FC.
U kongsan ha kane ka lympung u dei u Bah Shemphang L Mawphlang uba dei u Litigation Secretary ka KSU CEC. La ia don ryngkat ruh u Bah Basil Nongbri uba dei u Rangbah Dong ka Umroh, Mawkasiang; u Bah Eric Nongkynrih bad u Bah James Hitler Mawphniang kiba dei ki Assistant General Secretaries ka KSU CEC.
U Bah Raymond Kharjana uba dei u Education Secretary ka KSU CEC, u Bah Sonstar Nongkhlaw uba dei u Assistant Finance Secretary ka KSU CEC bad u bah Districtland Marweiñ uba dei u President ka Îatreilang Suppliers’ Association.
Ki jingialehkai ki long hapdeng ka KSU Shillong Mihngi Circle pyrshah ia ka Shillong Labet FC bad ka Mawkasiang Sports & Cultural Club pyrshah ia ka KSU Mawkasiang Unit.
Ka Shillong Labet FC ka la jop da 5 kol ia ka KSU Shillong Mihngi Circle katba ka jingiakhun hapdeng ka KSU Mawkasiang Unit bad ka Mawkasiang Sports & Cultural Club ka la kut ha ka jingiakhaid khlem don ba thep kol.
Ban ioh ia u namjop la pyniaid da ka Tie-Breaker ha kaba ka KSU Mawkasiang Unit ka la pynkhih jar 6 sien ban jop ia ka Mawkasiang Sports & Cultural Club kaba ioh pynkhih jar 5 sien.
Ha ka final ka Shillong Labet FC ka la thep 4 kol pyrshah ia ka KSU Mawkasiang Unit bad ka la long ka lahduh. Ha kane ka sngi la ioh ruh ban ot ia u cake ban rakhe ia kane ka lyngkhuh snem ba nyngkong jong ka KSU Mawkasiang Unit.
