Shillong, Naitung 23: U bah Banshailang Marbaniang u wei na ki nongtrei mon sngewbha u la thoh sha u myntri ba dei peit ia ka tnad sha iing jong ka sokkar jylla u Bah Comingone Ymbon ba dei ban plie noh ia ka jaka leitbar kaba don ha Lower Lachumier ha phyllaw ka ophis jong ka Administrative Building.
Ha kane ka jaka ki don ki ophis kum ka District Transport Office (DTO), Soil & Water Conservation, Consumer Forum, SAINIK Department bad kiwei kiwei. Katkum ka jubab kaba nga la ioh pdiang lyngba ka RTI Act 2005, lyngba u PIO jong ka GAD (A) la ong ba ia katei ka Painkhana ban pyndonkam paidbah.
Ban tei ia kane ka jaka leitbar la bei pisa na tnat GAD (A) ban pynbit pynbiang bad la pyntyllun iaka kam ban pyntrei lyngba ka ophis jong u Chief Engineer jong ka PWD (Buidling) bad katkum ka jingshem bad khmih bniah lyngba ki kot ki sla ba la ioh baroh ia katei ka kam la pyntrei naduh u Snem 2011 bad haduh kumba 10 snem kynthih la shu ieh khongreng kumba ka long khlem da pyndonkam wat hadien ba la dep iaka naduh kaba sdang.
Da kaba bishar bniah katkum ka khmat briew da kaba shu peit la iohi ruh ba nakaliang jong katei ka tnat haduh kumba 2 ne 3 sien kynthih la dep ban maramot da kaba pushara bad kumwei pat khlem da lah ban pyndonkam ia ka kum ka jingmyntoi u paidbah haduh kat mynta jong une u Snem 2020.
Kaei ka daw bah kaba la pynlong iaka Sorkar Jylla ban shu ieh sah khongreng kumtei haduh 10 snem kynthih ne wat ban shu pynlut phut kai iaka pisa khlem da lah ban pyndonkam naka bynta ka jingmyntoi jong ki paidbah bad kan don jingmyntoi aiu ruh ban shu shna khlem don ka jingiarap ia kiba bun ki paidbah kiba wan donkam ha katei ka jaka.
Kiba bun ki paidbah ki la shu leit shabar kat shaba lap bashem ne wat shadien jong katei ka building ruh kumjuh. Haba kumtei kan jia iano yn kynnoh, hato dei ki paidbah kiba leh bakla ne dei ka Sorkar Jylla. Balei ban donkam ruh ban buh ia ki Security Guard ha katei ka Campus lada ymdon ka jingthmu kaba biang.
Hapoh Lower Lachumiere la iohi ba don shibun ki ophis treikam bapher bapher jong ka Jylla bad la buh kyrpang ymtang iaki Contractor ne ki heh sorkar kiba wan donkam bad kiba don bun ki lad ki lynti ban leit shabar hynrei khambun dei ki riew paidbah kiba wan donkam da kiwei pat ki lynti ha kiba bun ki ophis hapdeng jong katei ka Jaka.
Kumta shisyndon mynne ka sngi nga la ioh ban phah da ka jingthoh markhmat sha u Myntri Sorkar Bah Comingone Ymbon ban dawa na u ba dei ban plié noh shisyndon ia katei ka painkhana khlem da buhteng shuh tang hapoh ka 10 (Shiphew) sngi naka bynta ka jingbit jingbiang bad ka jingmyntoi jong ki paidbah kiba wan donkam sha katei ka Jaka.
Na kaliang jong u Bah Comingone Ymbon u la pynpaw ba umdon jingtip eiei ruh em naduh kaba sdang halor kane ka bynta bad kumjuh ruh naduh ba u la shong ha katei ka shuki kum u Myntri jong ka Sorkar Jylla, hynrei u la ai ka jingkular ba un shimkhia noh dalade ia kane ka bynta khlem da pynslem ne buhteng shuh katkum ka jingdawa kaba janai.
U Bah Banshailang kum uwei na ki nongtrei mon sngewbha hapoh ka Jylla nga la ioh ruh ban phah lem iaka jingthoh sha u Chief Minister jong ka Sorkar Jylla, Shri. Conrad K Sangma kumjuh ruh shapoh ka Tnat GAD bad PWD kiba dei ki tnat ba dei peit ia katei ka Public Toilet hapoh katei ka Jaka naka bynta ban pynkloi da kaba pyntreikam noh ia katei ka Paiñkhana.
U Bah Banshai u la ong ba u kloi ban pdiang ia ki rai kiba janai kiba mih napoh ka Sorkar Jylla khlem da don kano kano ka jingpynthut da kumwei pat, hynrei lym kumta ngam banse wat ban phah lem iaka jingthoh shapoh ka Ophis treikam jong u Myntri Rangbah duh jong ka Ri India u Narendra Modi.
