Shillong, Iaiong 28: U Bah D.P Iangjuh, MLA barim jong ka Mawsynram constituency, uba la shongthait noh mynta ha ka kam sain pyrthei u la pynpaw ba u dang sahnud ia ka jingkieng ha Ryngku kaba pyniasoh ia ki shnong kiba don markhap bad ka ri Bangladesh, namar haduh mynta ka sorkar jylla kam shym la lah ban leh eiei.
Ia kine ki kyntien u Bah DP Iangjuh u la kren kum u Kongsan ha ka jingiakynduh lang ki nong Mawsynram Constituency kiba sah ha Shillong ba la pyniaid da ka Mawsynram Constituency Welfare Organisation Shillong kaba la long ha U Soso Tham Auditorium, State Central Library, Shillong myn ha ka 27 tarik mynta ubnai.
U Bah Iangjuh u la pynpaw ba ha ka por ba u long kum u MLA ka Mawsynram constituency u la pynkhreh ban shna ia kane ka jingkieng bad la wad ia ki stad wadbniah na ki company namar ka PWD (Raods) kam don la ka jong, hynrei haba la wad la ioh ia ka company kaba dei trai ki Khasi, haba ka suki ban treikam u la pyrkhat ban pynduh noh ia kane ka company hynrei u don ka mynsiem para Khasi hynrei lada weng un shah kynnoh hynrei lada ym weng ruh ka kam kam iaid hynrei haduh mynta um tip shuh la u nongmihkhmat ba mynta u la buddien ne em ia kane.
Ha ka juh ka por ba uno uno u MLA uba wan shadien ki dei ban buddien namar kane ka jingkieng ha Ryngku ka long kaba donkam na ka bynta ka jingmyntoi ki briew kiba sah ha khappud bad ka ri Bangladesh. “Naduh ba nga la ioh ia ka shithi ban wan sha kane ka jingialang nga la sngewkmen palat bad katno nga kwah ban iakynduh ia ki nong Mawsynram constituency namar ka long kaba donkam ban iakynduh teng teng” u la ong.
U la kyntu ia ki nongkitkam jong kane ka seng ba kin kitkhia ia ka kam namar la seng na ka bynta ka jingmyntoi lang ki nong Mawsynram constituency kiba sah ha ShillongU Bah Iangjuh u la ong biang haba phai ha ki kam ki jam, ym lah ban kiar ia ka “Politics” namar baroh ki jingdonkam jong ki paidbah kiba dei ki kam pynroi, 80 percent ki dei ban iaid lyngba ki nongmihkhmat paidbah,hynrei ki don ki MLA haba ki long Myntri ha ka sorkar jylla kim ju pyrkhat ia ka jylla hynrei ki pyrkhat beit ialade shimet.
“Nga la lap bunsien haba nga long MLA, khamtam haba nga iatyngkhuh bad ki kam pynroi bad ka Shella constituency hynrei ngam ju aili ngam ju tieng nga kren beit ia ka jingshisha lada ki don ki ophisar ne ki Myntri kiba thmu ban pynduh ia ki kam pynroi sha ka Mawsynram constituency” u la ong.
Ha ka juh ka por u Bah DP Iangjuh u la ai burom ia ki MLA kiba la mihkhmat ia ka Mawsynram constituency naduh u snem 1972 bad u la ai burom kyrpang ia u bah Mestonnad Kharchandi uba dei u nongmihkhmat uba khuid bad uba beit ha ka jingtreikam. Kumta kum u MLA barim u la kyntu ia ki paidbah ba kin jied ia ki nongmihkhmat kiba lah ban trei ia ka constituency baroh kawei khnang ba ka Mawsynram kan nym sahdien ha baroh ki liang.
Na ka liang u bah HM Shangpliang, IAS, uba dei u Director ka tnad Social Welfare ka sorkar jylla u la pynpaw ka jingsngewsarong ban ieng ha kane kajingialang kum u nong Mawsynram constituency uba sah ha Shillong, namar um ju mut dur bad um ju poi pyrkhat ba ka Mawsynram kan paw ha ka pyrthei haba ka dei ka shnong kaba tyrkhong kaba dap tang da ki maw suda.
“Haba nga leit sha kiwei ki Ri jong ka pyrthei, kim tip lada nga ong jylla Meghalaya, ki tip tang ia ka India hynrei lada nga ong nga dei trai shnong na Mawsynram ki tip namar ka dei ka jaka ba jur slap tam ha ka pyrthei” u la ong.U la ong biang balei ki nong Mawsynram ki wan sah ha Shillong ka dei namar ki wan wad kam wad jam, ki wan bylla ban im jakpoh ki wan pule dangle na kabynta ban pynbit pynbiang ialade bad ia ka iing ka sem, hynrei ym don ba lum ba lang ia ki bad dei tang kane ka seng kaba la mih pyrthei ban pyniatylli kawei ia ki nong Mawsynram constituency kiba sah ha Shillong.
U Bah Shangpliang u la ai mynsiem ia ki nongkitkam jong ka MCSWO ba watla kane ka jingialang kaba dang sdang ka ban bun ki jingshah kynthoh hynrei ki dei ban trei beit ia ka kam da ka mynsiem shynrang na ka bynta ban iarap ia ki para shnong haba ki iakynduh jingeh haba ki sah ha Shillong.
Ha kane ka sngi la ioh ban pynskhem ia ki nongkitkam ba pura jong ka MCSWOS da u Bah HJ Skhemlon, Sirdar Hima Mawdon uba la air uh ka jingsneng kyntu kynpham, la ioh jingkren na u Bah Starfing Pdahkasiej, u trai jong ka SP News, u Bah Tobias Marak, Vice-Chairman ka Forest Development Corporation jong ka sorkar Meghalaya, kong Pondora Rapsang bad ia ka jingialang la pyniaid da u Bah Arjune Katrai, Chairman ka MCWOS.
La pynshngain ia kane kajingialang da kajingrwai da ki samla na Pyndensohsaw, ka jingshad na ki samla na Mawlyngbna, ka jingshad na ka samla Daphisha Kharbani, ka kynhun ki heprit ka All Meghalaya Dancers’ Association (AMDA) bad la rwai da u Bah Banker Kharkongor.
Ki nongkitkam jong ka MCWOS ki long Chairman- Bah Arjune Katrai, Vice-Chairman- Bah Rangsan Sohmat, Bah Johny Kharbani, Bah Belong Sangma, General Secretary- Bah Section Syiemlieh, Joint Secretary kiba peit ia ki Area ki long Sawsymper Area- Bah Mighty Lyngdoh, Mawsynram Area- Bah Reading Nongsiej, Lawbah Area- Bah Darwin Lyngdoh, Hatmawdon Area- Soudan Kharraswai, Ryngku Area- kong Bontimarrie Sangma, Sonatola Area- Bah Bidhan Hajong, Dangar Area- Bah Kynsai Thongni, Pyndensohsaw Area-Bah Mikeosiris Kharraswai, Publicity secretary- Bah Aibor Hynniewta, ki Auditor ki long Bah Julius Syiemlieh bad Donboklang Wanniang.
